Per­sónu­vernd barna - hvaða upp­lýs­ing­ar vinn­ur bank­inn um þig?

Allar upplýsingar um þig eða sem tengjast þér eru persónuupplýsingar, t.d. nafnið þitt, kennitalan, heimilisfang og símanúmer og jafnvel ljósmyndir af þér eða myndbönd. Persónuvernd þýðir að þú átt rétt á þínu einkalífi. Bankinn biður þig ekki um meiri upplýsingar en hann þarf.
27. janúar 2021 - Landsbankinn

Af hverju þarf bankinn persónuupplýsingar um þig?

Bankanum er skylt samkvæmt lögum að þekkja viðskiptavini sína. Þess vegna þarf hann að fá upplýsingar um nafnið þitt, aldur, hvar þú átt heima og hvernig hægt er að hafa samband við þig, t.d. ef stofnaður er reikningur í þínu nafni eða þú færð aðgang að netbanka/appi bankans. Einnig biður bankinn um afrit af skilríkjunum þínum ef þú átt gild skilríki, til dæmis vegabréf eða rafræn skilríki.

Hvernig notar bankinn persónuupplýsingarnar þínar?

Bankinn þarf mismunandi upplýsingar um þig eftir því hvaða þjónustu þú notar. Ungir viðskiptavinir bankans geta t.d. stofnað bankareikninga, fengið kort til að borga með, byrjað að spara, stofnað aðgang að netbanka og notað Landsbankaappið, allt eftir þörfum og aldri hvers og eins. Ef þú ert yngri en 13 ára þarf foreldri eða forráðamaður að stofna til viðskipta fyrir þig en eftir 13 ára aldur getur þú óskað eftir ákveðinni þjónustu án aðkomu foreldra. Bankinn notar upplýsingarnar um þig þegar það er nauðsynlegt svo þú getir notað þjónustuna eins og þér hentar. Það gilda alls konar lög um bankastarfsemi og upplýsingar þínar. Bankinn má ekki skoða eða nota upplýsingar þínar nema hafa góðu ástæðu til þess. Þær eru m.a. notaðar til þess að:

  • Kynnast þér áður en þú byrjar í viðskiptum eða hafa samband við þig síðar.
  • Leyfa þér að nota vörurnar okkar eins og bankareikning, kort, netbanka og öpp eða hjálpa þér á annan hátt ef þú óskar eftir því.
  • Fylgja lögum og reglum sem gilda um bankann og starfsemi hans til þess að tryggja öryggi þitt og upplýsinga þinna.
  • Hjálpa bankanum að búa til betri vörur og þjónustu, t.d. fyrir ungt fólk.

Bankinn notar upplýsingarnar þínar aðeins eins og hann má samkvæmt lögum og eins og þú eða foreldrar þínir hafið leyft okkur að gera. Foreldrar eða forsjáraðilar hafa umsjón með fjármálum þínum ef þú ert undir 18 ára. Í þeim tilgangi fá forsjáraðilar lesaðgang að innlánsreikningum þínum og geta óskað eftir öðrum upplýsingum um þig hvenær sem er og bankinn verður oftast að afhenda þær.

Hvaðan fær bankinn upplýsingar um þig?

Stærstur hluti af upplýsingum sem bankinn notar koma frá þér þegar þú byrjar í viðskiptum. Bankinn fær ýmsar aðrar upplýsingar um þig þegar þú notar þjónustuna okkar eins og bankareikninga, kort eða app en þá verða til meiri upplýsingar um þig, sem bankinn verður að geyma. Þegar þú borgar með korti eða með símanum þá sér bankinn í hvaða búð þú ert og hvað þú eyðir miklu en bankinn sér ekki hvað þú kaupir. Þegar þú átt bankareikning sér bankinn hvenær þú leggur inn, tekur út og hvert þú millifærir peninga. Þegar þú skoðar vefsíðu eða öpp bankans safna vefkökur upplýsingum um þig og hvað þú gerir á vefsíðunni. Ef þú ert yngri en 18 ára getur foreldri þitt eða forráðamaður einnig afhent okkur upplýsingar um þig, t.d. ef sótt er um kort eða stofnaður er bankareikningur fyrir þig. Ef þú heimsækir útibú bankans, hringir í okkur eða spjallar við okkur í netspjalli þá geymum við upptökur og efni úr öryggismyndavélum, símtali og netspjalli í stuttan tíma.

Þegar þú notar Sprotaappið safnar Landsbankinn hf. hvorki né meðhöndlar persónuupplýsingar um notendur leiksins að IP tölum undanskildum. Þau gögn sem sótt eru í gegnum leikinn („Sprotaappið“) eru eingöngu gögn til að greina og bæta leikinn og það kerfi sem hann byggist á. Meðal þeirra upplýsinga sem sóttar eru í gegnum leikinn eru: tegund tækisins sem notað er til að spila leikinn, framleiðandi tækisins, útgáfa stýrikerfis þess, staða minnis á tækinu þegar leikurinn er spilaður, upplýsingar í tengslum við notkun og hversu oft leikurinn er spilaður.

Þú átt ákveðinn rétt og getur stjórnað upplýsingunum þínum

Börn og ungt fólk eiga sama rétt og fullorðnir. Samkvæmt lögum getur þú óskað eftir því að:

  • Fá að sjá hvaða upplýsingar bankinn á til um þig og fengið þær sendar.
  • Breyta eða leiðrétta upplýsingar um þig.
  • Bankinn hætti að nota upplýsingarnar þínar af einhverri ástæðu eða mótmælt því að bankinn noti þær.
  • Upplýsingum um þig verði eytt. Bankinn getur eytt upplýsingum ef lög leyfa það.
  • Bankinn noti ekki tölvur til að taka ákvörðun um þig (bankinn notar ekki tölvur til að taka ákvarðanir um fólk sem er yngra en 18 ára).

Ef þú ert eldri en 13 ára og með rafræn skilríki getur þú beðið okkur um þessa hluti í réttindagátt Landsbankans. Ef þú ert yngri en 13 ára getur þú beðið foreldri eða forráðamann um að aðstoða þig.

Við pössum upplýsingarnar þínar og látum þig vita ef eitthvað fer úrskeiðis

Það getur verið erfitt að skilja af hverju upplýsingar eru mikilvægar og af hverju það er mikilvægt fyrir þig að passa upp á þær og stjórna þeim. Hugsaðu um eitthvað sem skiptir þig miklu máli – eins og símann þinn eða annan hlut sem þér þykir vænt um. Þú vilt ekki að einhver annar skoði þessa hluti nema þú hafir leyft það. Ef þú leyfir einhverjum að nota hlutina þína þá viltu vita hvernig þeir eru notaðir, að farið sé vel með þá og að þú fáir að vita ef eitthvað kemur fyrir hlutina. Þannig hugsar Landsbankinn um upplýsingarnar þínar því þær eru mikilvægar fyrir þig og þitt einkalíf.

Hvað eru upplýsingar um þig geymdar lengi?

Bankinn verður að geyma upplýsingar um þig og hvernig þú notar þjónustu okkar, því það eru lög sem segja okkur að gera það. Bankinn geymir upplýsingar um þig á meðan þú velur að nota vörurnar okkar, öppin eða aðra þjónustu. Þegar bankinn þarf upplýsingarnar ekki lengur þá hættir hann að nota þær eða eyðir þeim.

Stundum þarf bankinn að afhenda upplýsingar um þig til annarra. Bankinn vinnur með öðrum fyrirtækjum sem hjálpa bankanum að veita þér þjónustu. Ef þú til dæmis vilt tengja kortið þitt við símann eða úrið til að borga er nauðsynlegt að afhenda upplýsingar um kortið þitt til fyrirtækjanna sem framleiða símann eða úrið. Bankinn veitir öðrum fyrirtækjum aðgang að upplýsingum um þig ef þau hjálpa okkur að veita þér bankaþjónustu. Fyrirtæki sem býr til debetkort fyrir þig er dæmi um þannig fyrirtæki. Bankanum getur líka verið skylt að afhenda upplýsingar til opinberra aðila sem fylgjast með því að bankinn fari eftir lögum.

Viltu vita meira eða hefur þú spurningar?

Í bankanum vinnur persónuverndarfulltrúi sem fylgist með því hvað bankinn gerir við upplýsingarnar um þig. Ef þú ert eldri en 13 ára þá getur þú spurt persónuverndarfulltrúann um það hvað bankinn gerir við upplýsingarnar þínar. Ef þú ert yngri en 13 ára geta foreldrar þínir eða forráðamenn sent persónuverndarfulltrúanum okkar tölvupóst á personuvernd@landsbankinn.is

Þú gætir einnig haft áhuga á
Fjölskylda við rafmagnsbíl
20. maí 2024
Ertu að hugsa um að kaupa rafbíl?
Kaupverð og rekstrarkostnaður vega þungt í ákvarðanatöku um bílakaup en umhverfis- og samfélagsábyrgð skipta okkur flest æ meira máli. Til viðbótar við gerð, lit og stærð þarf að velja á milli orkugjafa, en rafbílar eru að hasla sér völl í öllum stærðarflokkum fólksbíla. Þannig eru nú til fjölmargar rafbílategundir í öllum flokkum sem mætt get fjölbreyttum þörfum neytenda. Allir ættu því að geta fundið eitthvað við sitt hæfi.
Íbúðir
8. maí 2024
Getur borgað sig að festa vexti þegar þeir eru svona háir?
Þau sem festu vexti á óverðtryggðum íbúðalánum þegar vextir voru sem lægstir, sjá nú fram á að greiðslubyrðin af lánunum muni hækka verulega þegar vextirnir losna. Margar leiðir eru færar til að lækka greiðslubyrði af íbúðalánum og ein þeirra er að festa vextina. En getur það borgað sig þegar vextir eru svona háir og fara vonandi lækkandi?
Lyftari í vöruhúsi
8. maí 2024
Verðbólgan á allra vörum - nokkur lykilatriði til að hafa á hreinu
Verðbólga, stýrivextir, verðbólguvæntingar og gengi. Hvað þýða þessi hugtök og af hverju skipta þau máli?
Ungt fólk
5. apríl 2024
Hvað breytist við að verða fjárráða?
Þegar þú verður fjárráða berð þú ábyrgð á peningunum þínum og viðskiptasögu. Við þessi tímamót er gott að staldra við, kynna sér mikilvæg atriði um fjármálin sín og fá sem besta yfirsýn yfir hlutina.
Stúlkur á hlaupahjólum
15. mars 2024
Hvað á að gera við fermingarpeninginn?
Áður voru fermingargjafir oft eigulegir gripir sem hjálpuðu fermingarbarninu inn í nýtt tímabil ævinnar – skatthol, pennar, orðabækur, merkileg skáldverk, hljómtæki, tjöld, armbandsúr eða ferðatöskur.
Hjón úti í náttúru
12. mars 2024
Það gæti borgað sig að spara í sjóðum ef þú færð greiðslur frá TR
Þau sem fá greiðslur frá Tryggingastofnun ríkisins hafa mörg hver rekið sig á að fjármagnstekjur umfram ákveðna fjárhæð geta skert greiðslurnar. Það er eðlilegt að spyrja sig hvaða leiðir séu bestar fyrir sparnaðinn, sérstaklega eftir að vextir tóku að hækka, og hvernig best er að haga sparnaði með tilliti til fjármagnstekna.
Verðbréfasíða í netbanka
24. jan. 2024
Viltu ná árangri með eignadreifingu?
Okkur er oft ráðlagt að dreifa eignum okkar til þess að draga úr sveiflum. Viðkvæðið „ekki setja öll eggin í sömu körfuna“ stendur fyrir sínu, en með því að dreifa áhættunni getum við varið okkur gegn ófyrirséðu tapi af stökum fjárfestingum.
18. jan. 2024
Hvernig er fjármálaheilsan?
Við upphaf nýs árs er mjög algengt að fólk byrji í heilsuátaki, enda oft ekki vanþörf á eftir margra vikna sykurát og óhóflega neyslu á mat og drykk. Það er upplagt að nota tækifærið til að velta líka fyrir sér fjármálaheilsunni og setja sér markmið um að bæta fjármálin.
16. jan. 2024
Hægt að spara stórfé með því að leggja bílnum
Svigrúmið til að skera niður föst útgjöld heimilisins þannig að virkilega muni um er oft lítið. Eitt liggur þó betur við höggi en flest annað, nefnilega hinn rándýri einkabíll!
Verðbréf í appi
4. jan. 2024
Þetta er gott að vita áður en þú kaupir í sjóði
Fjárfesting í verðbréfa- og fjárfestingarsjóðum er vinsæl leið til að ávaxta sparifé. Ef þú ert að velta fyrir þér að setja sparnaðinn þinn, eða hluta af honum, í sjóð er gott að þekkja nokkur lykilhugtök.
Vefkökur

Með því að smella á „Leyfa allar“ samþykkir þú notkun á vefkökum til þess að auka virkni vefsins, greina vefnotkun og aðstoða við markaðssetningu.

Nánar um vefkökur