Aukakrónur koma sér vel um jólin
Veltan í Aukakrónukerfi Landsbankans hefur aldrei verið meiri en í ár. Alls hafa viðskiptavinir safnað um 616 milljónum Aukakróna á þessu ári. Guðrún Heiða Bjarnadóttir, vörustjóri Aukakróna hjá Landsbankanum, á von á að þessi upphæð haldi áfram að hækka í desember og að slegið verði met í söfnun og notkun á Aukakrónum um jólin.
Næststærsti gjaldmiðill landsins?
Aukakrónur eru fríðindakerfi á vegum Landsbankans. Viðskiptavinir með plúskort eða kreditkort hjá Landsbankanum safna inneign í formi Aukakróna af allri innlendri verslun. Einnig er fjöldi fyrirtækja um allt land samstarfsaðilar í Aukakrónukerfinu og hjá þeim fá viðskiptavinir afslátt í formi Aukakróna í hvert sinn sem greitt er fyrir vörur eða þjónustu með korti tengdu kerfinu.
Aukakrónurnar safnast inn á sérstakt Aukakrónukort sem er aðgengilegt í Landsbankaappinu. Þaðan er hægt að bæta Aukakrónukortinu í öpp í símanum á borð við Google Wallet eða Apple Wallet og greiða með því eins og venjulegum greiðslukortum hjá fyrrnefndum samstarfsaðilum.
„Aukakrónukorthafar eru í dag um 80.000 talsins, sem gerir Aukakrónur að einu vinsælasta fríðindakerfi landsins,“ segir Guðrún Heiða. Hún segir að samstarfsaðilum Aukakróna hafi fjölgað með hverju árinu og þeir séu í dag 212 talsins. „Samstarfsaðilar okkar eru fyrirtæki af öllum stærðum og gerðum um allt land. Við erum í samstarfi við fyrirtæki sem eru mörg hver á meðal þekktustu fyrirtækja landsins, veitingastaðir, matvöruverslanir, bensínstöðvar, fyrirtæki sem bjóða upp á afþreyingu, upplifanir og margt fleira.“
Eins og fram kom hér að ofan hafa safnast 616 milljónir Aukakróna nú þegar í ár, sem er mikil hækkun frá síðasta ári. Viðskiptavinir hafa verslað fyrir samtals 520 milljónir Aukakróna hjá samstarfsaðilum á þessu ári, sem er einnig mikil hækkun frá því í fyrra. Það mætti segja að lítið hagkerfi hafi orðið til í kringum Aukakrónurnar. „Sumir hafa grínast með að Aukakrónur séu orðnar næststærsti gjaldmiðill landsins“, segir Guðrún Heiða.
Hún segir að þrátt fyrir að notkun á Aukakrónum sé góð þá sé enn mikið af ónýttum Aukakrónum. „Ég hvet ykkur öll til að kíkja í Landsbankappið og skoða hvort þar leynist kannski Aukakrónur til að létta undir um jólin.“
Jólasjóður í Aukakrónum
En hvernig nota viðskiptavinir Aukakrónurnar sínar? Eru þeir að safna fyrir einhverju sérstöku eða nota þeir þær til að versla í matinn svona hversdags?
Guðrún Heiða segir að skipta megi viðskiptavinum Aukakróna í tvo hópa. „Annar hópurinn safnar Aukakrónum hægt og rólega yfir allt árið, án þess að taka endilega eftir því, og notar þær síðan til dæmis í desember. Aukakrónurnar eru þannig orðnar að eins konar jólasjóði sem hægt er að nota í jólagjafir, jólaskraut eða jólamatinn. Hinn hópurinn nýtir Aukakrónurnar sínar reglulega yfir árið, sumir til að versla í matinn eða kaupa eldsneyti á bílinn. Einn starfsmaður hjá Landsbankanum nýtir þær til dæmis til að panta pítsu einu sinni í mánuði.“
Guðrún Heiða mælir einnig með að horfa til þess við jólainnkaupin að fá endurgreiðslu í formi Aukakróna. „Kortaveltan eykst hjá öllum í desember, það er bara staðreynd. Af hverju ekki að beina þessari veltu til samstarfsaðila og safna þannig enn fleiri Aukakrónum?“
Eins einfalt og það gerist
En hvernig eru Aukakrónurnar frábrugðnar öðrum fríðindakerfum?
Guðrún Heiða segir að sérstaða Aukakróna felist bæði í miklum fjölda samstarfsaðila og þeirri staðreynd að bankinn greiðir með kerfinu. „Aukakrónurnar sem safnast koma nefnilega ekki eingöngu frá samstarfsaðilunum. Helmingurinn af þeim kemur frá bankanum sjálfum.“
Í grunninn byggist kerfið á sjálfvirkni sem gerir það að verkum að viðskiptavinir þurfa ekki að taka aukaskref til að fá endurgreiðsluna eða eyða tíma í að leita að afslættinum. „Þú þarft aldrei að taka upp símann til að sýna eitthvert tilboð eða leita sérstaklega eftir tilboðum. Þú bara notar kortið og kerfið sér um að safna Aukakrónunum fyrir þig,“ segir Guðrún Heiða.
„Það eina sem viðskiptavinir þurfa að gera er að versla hjá samstarfsaðilum þegar þau vilja greiða með Aukakrónunum sínum. Það er grunnhugsunin á bak við kerfið. En að því sögðu þá eru samstarfsaðilar okkar stundum með sérstök Aukakrónutilboð þar sem viðskiptavinir gætu þurft að sýna Aukakrónukortið sitt.“ Hægt er að kynna sér alla samstarfsaðila og Aukakrónutilboð á aukakronur.is.
Aukakrónur eru auðskiljanlegar og allar upphæðir hafa sama verðgildi og venjulegar krónur. Ein Aukakróna hefur þannig sama verðgildi og ein íslensk króna. Guðrún Heiða segir að það hjálpi viðskiptavinum mikið. „Kerfið er ekki eins og hefðbundið punktakerfi þar sem virði punkta er frábrugðið raunverulegum upphæðum í krónum. Upphæðin sem þú átt í Aukakrónum er nákvæmlega sú upphæð sem þú getur nýtt til að versla hjá samstarfsaðilum okkar,“ segir Guðrún Heiða.
Því skal þó haldið til haga að það er ekki hægt að millifæra Aukakrónur inn á bankareikninginn sinn eða taka þær út í reiðufé. „Það er aðeins hægt að greiða með Aukakrónum hjá samstarfsaðilum okkar eða millifæra Aukakrónurnar á annan Aukakrónureikning.“
Aukakrónurnar safnast inn á sérstakt Aukakrónukort sem er aðgengilegt í Landsbankaappinu. Þaðan er hægt að bæta Aukakrónukortinu í öpp í símanum á borð við Google Wallet eða Apple Wallet og greiða með því eins og venjulegum greiðslukortum hjá fyrrnefndum samstarfsaðilum.
Aukakrónur í örum vexti
Í febrúar var Aukakrónudagurinn haldinn í fyrsta skipti. Á Aukakrónudeginum buðu valdir samstarfsaðilar 20% endurgreiðsluafslátt í formi Aukakróna. Guðrún Heiða segir að dagurinn hafi heppnast mjög vel og stefnt sé á að halda annan Aukakrónudag á næsta ári. „Fjörutíu samstarfsaðilar tóku þátt í Aukakrónudeginum með okkur og það myndaðist afar skemmtileg stemning í kringum daginn. Við erum þegar farin að undirbúa næsta Aukakrónudag sem verður haldinn 2026.“
Guðrún Heiða segir Aukakrónur hafa vaxið sem vörumerki í gegnum árin. „Bæði notendum og samstarfsaðilum hefur fjölgað og veltan í kerfinu aukist með hverju árinu. Það er alltaf eitthvað skemmtilegt í gangi: Aukakrónudagurinn, Aukakrónuhlaupið, sértilboð frá samstarfsaðilum og margt fleira. Ég hvet ykkur öll til að kynna ykkur málið og byrja að safna Aukakrónum.“
Allar frekari upplýsingar um Aukakrónur má finna á aukakronur.is.
