Landsbankinn gefur út víkjandi forgangsbréf í sænskum og norskum krónum
Landsbankinn hefur lokið sölu á skuldabréfum með breytilegum vöxtum að fjárhæð 1.000 milljónir sænskra króna og 250 milljónir norskra króna. Skuldabréfin eru til fjögurra ára og með heimild til innköllunar að þremur árum liðnum.
10. september 2024
Skuldabréfin eru neðar í kröfuröð en hefðbundin óveðtryggð skuldabréf, en ofar víkjandi skuldabréfum bankans, svokölluð víkjandi forgangsbréf (e. senior non-preferred bond). Skuldabréfin voru seld á 180 punkta álagi á þriggja mánaða millibankavexti í sænskum krónum og 183 punkta álagi á þriggja mánaða millibankavexti í norskum krónum. Skuldabréfaútgáfan er sú fyrsta sinnar tegundar hjá íslenskum banka. Þess er vænst að lánshæfiseinkunn bréfanna hjá alþjóðlega matsfyrirtækinu S&P verði BBB.
Heildareftirspurn var rúmlega tvöföld frá yfir tuttugu norrænum fjárfestum. Umsjónaraðilar útboðsins voru DNB og Nordea.