Draumur að móta vinnustaðamenningu
„Ég náttúrulega tek við afar góðu búi,“ segir Sirra. „Ég vissi að Landsbankinn væri frábær vinnustaður og hafði heyrt af mjög öflugu fræðslustarfi hér. Það kom mér aftur á móti á óvart hversu dreifður vinnustaðurinn var á höfuðborgarsvæðinu, margar starfsstöðvar bæði í miðbænum og annars staðar. Húsnæðið studdi ekki nægilega vel við starfsemi og markmið bankans.“ Sirra er að vísa til þess að Landsbankinn flutti starfsemi sína úr Austurstræti og tengdum húsum yfir í nýtt hús bankans við Reykjastræti 6 í miðbæ Reykjavíkur.
„Það var náttúrulega áskorun að koma inn í svona stórt verkefni en að sami skapi er þetta draumurinn fyrir mannauðsfólk - að fá að koma inn í verkefni þar sem þú færð tækifæri til þess að hafa áhrif á vinnustaðamenningu,“ segir Sirra. Mikil áhersla var lögð á stuðning og fræðslu fyrir stjórnendur til að undirbúa þá undir bæði ný tækifæri og áskoranir sem fylgja svona stórum breytingum. Klara bætir við að þó stjórnendur hafi fengið sérstakan stuðning hafi „allt starfsfólk fengið fræðslu og þjálfun til að læra nýja nálgun í vinnu og samskiptum í verkefnamiðuðu vinnuumhverfi. Þó svo að allflestir hefðu verið farnir að vinna í opnum rýmum og verið komnir út úr sínum einkaskrifstofum í eldra húsnæði Landsbankans vorum við með illa nýtta fermetra og unnum mikið í sílóum.“
Fjölbreytileikinn stærsti kosturinn
Landsbankinn innleiddi að fullu verkefnamiðað vinnurými í nýju húsnæði. Sirra segir að þó vissulega sé rekstrarhagræði og góð nýting á fermetrum af fyrirkomulaginu þá er það fyrst og fremst aukinn sveigjanleiki sem hafi drifið breytinguna áfram í Landsbankanum. „Kosturinn við verkefnamiðað vinnurými er að geta boðið upp á fjölbreytileika og eiga þá meiri möguleika á að koma til móts við starfsfólk, einmitt vegna þess að við vitum að eitt hentar ekki öllum.“ Sirra bætir við að starfsfólk þurfi þannig ekki að velja annað hvort eða, opið eða lokað rými. Í nýju húsi séu starfsstöðvar opnar, en hægt að finna næðisrými, hópvinnurými, opið vinnurými þar sem unnið er í hljóði o.s.frv. Klara segir ljóst að húsið styðji vel við fræðslustarf og leiki stórt hlutverk í stóraukinni þátttöku í fræðslu undanfarið. „Húsið og ólíku rýmin sem það býður upp á og tæknilausnirnar sem því fylgir gera okkur kleift að bjóða öllu starfsfólki að taka þátt í fræðslu með streymi og síðan upptökum þannig að enginn missi af. Við leitum alltaf allra leiða til þess,“ segir Klara.
Sveigjanleiki um allt land, í starfi og í fræðslu
Sveigjanleikinn í vinnuumhverfinu nær til allra vinnustaða Landsbankans en bankinn heldur úti starfsemi á 32 stöðum á landinu. Í dag er verkefnum sem hægt er að vinna miðlægt dreift í gegnum kerfi sem kallast Miðjan. „Þegar þú hringir í Landsbankann eða sendir okkur línu getur starfsfólk um allt land sinnt erindunum. Það opnar á tækifæri til þess að viðhalda opnunartíma þó að heimsóknum hafi mögulega fækkað á einhverjum stöðum og eins getum við haldið fólki á landsbyggðinni í fullu störfum,“ segir Sirra.
Sveigjanleikinn nær einnig til fræðslustarfsins, því sama starfsfólk getur verið bæði nemendur og kennarar, allt eftir aðstæðum. „Starfsfólkið er hjarta fræðslustarfsins,“ segir Klara „og fræðslumenningin er þannig að þau líta á þetta sem hluta af sínu starfi, bæði að kenna og miðla sinni þekkingu, og síðan að sitja fræðslu. Þessi menning birtist ekki einungis í virkri þátttöku heldur einmitt einnig í þeirri staðreynd að meirihluti leiðbeinanda á fræðsluviðburðum hjá okkur er starfsfólk bankans. Sirra og Klara eru sammála um að sterk fræðslumenning Landsbankans sé mikið mótuð af að nýta fólkið sem vinnur þar, sérfræðingana. „Starfsfólkið býr yfir dýpri innsýn í starfsemi bankans en utanaðkomandi sem gerir fræðsluna markvissari og tengdari raunverulegum verkefnum. Það er ekki sjálfgefið að starfsfólk líti á það að miðla þekkingu sem hluta af sínu starfi en þetta viðhorf er sem betur fer til staðar hér,“ segir Klara.
Flutningar tækifæri til að efla fræðslustarf
Klara segir að samhliða flutningunum hafi verið lögð áhersla á að aðlaga fræðslu að síbreytilegu starfsumhverfi og vaxandi þörf fyrir nýja færni. „Símenntun verður sífellt mikilvægari hluti af starfsþróun og við hvetjum starfsfólk stöðugt til að huga að henni og uppfæra þekkingu sína í síbreytilegu umhverfi. Fræðsluáætlanir eru þróaðar með framtíðarfærni að leiðarljósi og við leggjum áherslu á að bjóða upp á fræðslu og þjálfun sem miðar að því að veita starfsfólki tækifæri til að vaxa í takt við kröfur vinnumarkaðarins.“
„Við settum til dæmis verkefnið „Vöxtur og velgengni í starfi“ á laggirnar síðasta haust,“ segir Sirra. Þátttakendur í verkefninu fá markvissa þjálfun sem hefur það að markmiði að efla faglega og persónulega þróun þeirra og stuðla að þróun framtíðarleiðtoga. Þau sátu umfangsmiklar og fjölbreyttar vinnustofur yfir tvær annir og unnu heimaverkefni. Samhliða þjálfuninni fengu þátttakendur mentor innan bankans, sem þau hittu reglulega á meðan á verkefninu stóð, en mentorarnir eru hópur stjórnenda og öflugra sérfræðinga sem veita þátttakendum leiðsögn og stuðning. „Markmiðið með svona mentoraverkefni samhliða þjálfuninni er að viðhalda og miðla þekkingu innan bankans og stuðla að enn meiri árangri þar sem þátttakendur fá bæði praktíska og persónulega leiðsögn frá reyndu samstarfsfólki,“ segir Klara.
Afrakstur áherslubreytinga í fræðslu er sú að þátttaka fjórfaldaðist á milli áranna 2023 og 2024. Ríflega helmingur fræðsluviðburða eru haldnir af starfsfólki, 94% starfsfólks sækir sér valkvæða fræðslu og hlutföll á milli kynja eru nokkurn veginn jöfn.
Klara segist hafa fundinn mikinn meðbyr með að setja aukinn kraft í fræðslumál frá yfirstjórn við þessar breytingar sem flutningarnir voru og að það hafi skilað sér margfalt til baka. „Ég held að flestir sem einhvern tímann hafa unnið í mannauðs- og fræðslumálum viti að ef að það kemur einhvers konar meðbyr þá verður maður að grípa tækifærið og bara hlaupa af stað,“ segir Sirra.
