Vinnumarkaðurinn heldur áfram að rétta úr kútnum
Samkvæmt vinnumarkaðsrannsókn Hagstofu Íslands er áætlað að um 211.600 manns hafi verið á vinnumarkaði í ágúst 2021, sem jafngildir 79,8% atvinnuþátttöku. Af þeim voru um 200.800 starfandi, eða 75,8% af vinnuaflinu, og um 10.900 atvinnulausir og í atvinnuleit, eða um 5,5% af vinnuaflinu.
Starfandi fólki í ágúst fjölgaði um 5.900 milli ára, en fækkaði nokkuð frá síðasta mánuði, en í júní og júlí hafði starfandi fólk aldrei verið fleira í einum mánuði í vinnumarkaðsrannsókninni. Atvinnulausum fækkaði um 2.800 frá ágúst í fyrra en fjölgaði nokkuð frá síðasta mánuði. Hlutfall starfandi var 75,8% í ágúst og hækkaði hlutfallið um 1,4 prósentustig frá ágúst 2020.
Atvinnuþátttaka hefur aukist nokkuð á þessu ári og var 79,8 % nú í ágúst, sem var reyndar lægra en næstu 3 mánuði á undan. Atvinnuþátttakan í ágúst var 0,1 prósentustigi hærri en í ágúst í fyrra. Sé miðað við 12 mánaða hlaupandi meðaltal var atvinnuþátttaka mest um mitt ár 2017, en þá fór hún upp í 82%. Samsvarandi tala nú er 78,1% og hefur atvinnuþátttaka á þann mælikvarða verið á stöðugri uppleið frá því í janúar.
Atvinnuleysi, samkvæmt mælingum Hagstofunnar, var 5,2% í ágúst, sem er 1,4 prósentustigum lægra en á sama tíma í fyrra. Almennt atvinnuleysi skráð hjá Vinnumálastofnun var hins vegar 5,5% í ágúst og hafði minnkað um 3 prósentustig milli ára.
Samkvæmt könnun Hagstofunnar höfðu alls um 27.200 einstaklingar þörf fyrir atvinnu í ágúst 2021. Sá fjöldi jafngildir 12,2% af vinnuafli og mögulegu vinnuafli. Samsvarandi tala var 9,9% í fyrri mánuði. Af þessum hópi voru 40% atvinnulausir (40% í júlí) og 34% tilbúnir að vinna en ekki að leita að vinnu - það hlutfall var 22% í júlí. 6% voru í vinnuleit en ekki tilbúnir að vinna (9% í júlí) og 20% voru starfandi en samtímis vinnulitlir og vildu vinna meira (29% í júlí). Þessi tala Hagstofunnar, um 12,2% þörf fyrir atvinnu, er verulega hærri en mæling Vinnumálastofnunar á heildaratvinnuleysi í ágúst, sem var 5,5%. Samkvæmt þröngri skilgreiningu Hagstofunnar á atvinnuleysi var það hins vegar talið vera 5,2% í ágúst.
Starfandi fólki í ágúst fjölgaði um 3% miðað við sama mánuð í fyrra. Vinnutími styttist um 1% á sama tíma þannig að heildarvinnustundum fjölgaði um 2% milli ára. Þetta er fimmti mánuðurinn í röð sem við sjáum fjölgun heildarvinnustunda milli ára, en þeim tók að fækka í upphafi ársins 2020 um svipað leyti og faraldurinn brast á.
Lesa Hagsjána í heild:
