Vikubyrjun 4. nóvember 2024
Verðbólga lækkaði úr 5,4% niður í 5,1% í október, í samræmi við væntingar. Samhliða birtingu VNV tilkynnti Hagstofan að fyrirhugað kílómetragjald yrði tekið inn í vísitöluna. Í þessari viku birtir Vinnumálastofnum skráð atvinnuleysi í október, kosið verður um nýjan forseta í Bandaríkjunum, Seðlabanki Bandaríkjanna og Englandsbanki tilkynna um vaxtaákvarðanir og uppgjörstímabilið í Kauphöllinni er áfram í fullum gangi.
4. nóvember 2024
Vikan framundan
- Á morgun birtir Eimskip uppgjör og forsetakosningar fara fram í Bandaríkjunum.
- Á miðvikudag birta Kvika banki, Heimar og Sýn uppgjör.
- Á fimmtudag er vaxtaákvörðun hjá Seðlabanka Bandaríkjanna og Englandsbanka.
- Á föstudag birtir Vinnumálastofnun skráð atvinnuleysi í október.
Mynd vikunnar
Uppsafnaður halli á vöruskiptum við útlönd var 280 ma. kr. á fyrstu níu mánuðum ársins, sem er mjög svipað og á sama tímabili í fyrra, samkvæmt nýbirtum gögnum Hagstofunnar. Þetta er í fyrsta sinn frá árinu 2021 sem hallinn eykst ekki verulega á milli ára á tímabilinu. Þessi halli var viðbúinn, en síðustu ár hefur verið viðvarandi halli á vöruviðskiptum en að sama skapi ríflegur afgangur af þjónustuviðskiptum. Að hallinn aukist ekki á milli ára gæti verið merki um að hagkerfið fari kólnandi. Við gerum ráð fyrir halla á vöruskiptum í ár, líkt og fyrri ár, en smávægilegum afgangi af vöru- og þjónustuviðskiptum í heild.
Það helsta frá vikunni sem leið
- Vísitala neysluverðs hækkaði um 0,28% á milli mánaða í október og við það hjaðnaði verðbólga úr 5,4% í 5,1%. Hjöðnun verðbólgunnar var í samræmi við spá okkar, en við spáðum 0,27% hækkun á milli mánaða. Breyting stakra undirliða var í nokkrum tilfellum þó nokkuð ólík spá okkar: Matarkarfan og flugfargjöld til útlanda hækkuðu meira en við bjuggumst við en reiknuð húsaleiga hækkaði mun minna. Samhliða birtingu VNV tilkynnti Hagstofan að kílómetragjald yrði tekið inn í vísitöluna. Við væntum áframhaldandi hjöðnunar verðbólgu næstu mánuði og að verðbólga verði komin niður í 4,0% í janúar á næsta ári.
- Gistinóttum á hótelum fækkaði um 1,3% á milli ára í september. Fækkunin skýrist af 3,4% fækkun gistinótta erlendra ferðamanna, en gistinóttum Íslendinga fjölgaði um 9,7%. Gistinóttum á öllum tegundum gististaða fjölgaði um 4,1% á milli ára, þrátt fyrir að gistinóttum á hótelum hafi fækkað.
- Vinnumálastofnun barst engin tilkynning um hópuppsögn í september, annan mánuðinn í röð.
- Hagvöxtur mældist 2,8% á milli ársfjórðunga á þriðja ársfjórðungi í Bandaríkjunum. Vöxturinn var aðeins minni en búist var við. Það urðu einungis til 12 þúsund ný störf í október í Bandaríkjunum, sem er minnsta fjölgun starfa frá því að Biden tók við sem forseti, og spila hér inn í bæði fellibylur og verkföll. Hagvöxtur á evrusvæðinu var einungis 0,4% á milli fjórðunga á þriðja ársfjórðungi.
- Arion banki, Eik, Festi (fjárfestakynning), Marel (fjárfestakynning) og Nóva birtu uppgjör.
- Heimar seldi fasteignir, Reitir keypti fasteignir, það slitnaði upp úr samrunaviðræðum SKEL og Samkaupa, SKEL birti tilkynningu vegna 3. ársfjórðungs og Íslandsbanki tilkynnti um áframhald endurkaupaáætlunar.
- Eik stækkaði skuldabréfaflokk. Orkuveita Reykjavíkur gaf út nýjan ramma fyrir fjármögnun fjárfestingarverkefna samstæðunnar.
Hagtölur og markaðsupplýsingar
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
Þú gætir einnig haft áhuga á
17. nóv. 2025
Skráð atvinnuleysi var 3,9% í október, 0,5 prósentustigum meira en í sama mánuði í fyrra. Brottförum erlendra ferðamanna um Keflavíkurflugvöll fækkaði um 6,2% í október en utanlandsferðum Íslendinga fjölgaði um 3%. Peningastefnunefnd kemur saman á miðvikudaginn og við búumst við að stýrivöxtum verði haldið óbreyttum.
14. nóv. 2025
Við spáum því að peningastefnunefnd haldi stýrivöxtum óbreyttum í næstu viku. Verðbólga jókst umfram væntingar í október og verðbólgumælingin bar þess merki að undirliggjandi verðþrýstingur hefði aukist. Í ljósi breytts lánaframboðs og óviðbúinna áfalla í útflutningsgeirunum má líkast til búast við mildari tón frá peningastefnunefnd.
13. nóv. 2025
Við spáum því að verðbólga standi óbreytt á milli mánaða og mælist 4,3% í nóvember. Flugfargjöld til útlanda verða til lækkunar á vísitölunni, en reiknuð húsaleiga og matarkarfan verða til hækkunar. Við búumst við aukinni verðbólgu á næstu mánuðum.
10. nóv. 2025
Raungengi krónunnar er mjög hátt í sögulegu samhengi en hefur gefið lítillega eftir á allra síðustu dögum. Horfur í álútflutningi eru dræmar eftir bilun hjá Norðuráli og aflaheimildir gefa fyrirheit um samdrátt í útflutningi sjávarafurða. Ferðaþjónusta hefur vaxið umfram væntingar það sem af er ári og telja má horfur á vexti í nýjustu útflutningsstoðum Íslands. Velta samkvæmt VSK-skýrslum hefur þróast með svipuðum hætti í útflutningsgeiranum og í innlenda hagkerfinu, en ávöxtun hlutabréfa félaga í kauphöllinni með tekjur í erlendri mynt er mun lakari en fyrirtækja með tekjur í íslenskum krónum.
10. nóv. 2025
Fáar áhugaverðar hagtölur voru birtar í síðustu viku, en í þessari viku birtir Vinnumálastofnun skráð atvinnuleysi og Ferðamálastofa birtir ferðamannatölur. Uppgjörstímabilið fyrir þriðja ársfjórðung er í fullum gangi.
6. nóv. 2025
Hátt vaxtastig og ströng lánþegaskilyrði hafa slegið verulega á verðhækkanir á íbúðamarkaði. Á sama tíma hefur fjöldinn allur af nýjum íbúðum risið og sölutími þeirra lengst til muna. Eftir að dómur Hæstaréttar í vaxtamálinu féll hafa viðskiptabankarnir tekið lánaframboð til endurskoðunar og það sama má segja um suma lífeyrissjóðina. Seðlabankinn ákvað í síðustu viku að slaka lítillega á lánþegaskilyrðum.
3. nóv. 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
3. nóv. 2025
Verðbólga jókst umfram væntingar í október og mældist 4,3%. Svo mikil hefur verðbólga ekki verið síðan í febrúar síðastliðnum. Telja má áhyggjuefni að aukin verðbólga skýrist ekki af tilfallandi sveiflukenndum liðum heldur virðist undirliggjandi verðþrýstingur hafa aukist. Í þessari viku halda félög áfram að birta uppgjör og hugsanlega má búast við fleiri púslum í breytta mynd af framboði íbúðalána í kjölfar vaxtamálsins.
31. okt. 2025
Eftirspurn eftir vinnuafli hefur minnkað og dregið hefur úr hækkun launa. Atvinnuleysi hefur aukist smám saman og rólegri taktur í atvinnulífinu hefur endurspeglast í hægari fólksfjölgun. Kaupmáttur hefur aukist jafnt og þétt og við teljum að þótt hægi á launahækkunum komi kaupmáttur til með að aukast áfram á næstu árum. Mikill kraftur er í neyslu landsmanna, kortavelta eykst sífellt og Íslendingar hafa aldrei farið í fleiri utanlandsferðir.
30. okt. 2025
Vísitala neysluverðs hækkaði um 0,47% á milli mánaða í október og verðbólga jókst úr 4,1% í 4,3%. Vísitala neysluverðs hækkaði meira en við bjuggumst við, ekki síst reiknuð húsaleiga og verð á mat og drykk. Skammtímaspá okkar gerir nú ráð fyrir að verðbólga haldist í 4,3% út árið, en aukist svo í janúar og mælist 4,5%.