14. nóvember 2022
Vikan framundan
- Í dag birta Reitir árshlutauppgjör.
- Á þriðjudag birtir HMS vísitölu íbúðaverðs í október og Seðlabankinn tölur um greiðslumiðlun fyrir október.
- Á miðvikudag birtir Seðlabankinn niðurstöður úr könnun á væntingum markaðsaðila.
- Á fimmtudag birta Brim og Iceland Seafood árshlutauppgjör.
- Í vikunni fara síðan fram verðmælingar vegna nóvembermælingar vísitölu neysluverðs, en Hagstofan birtir hana þriðjudaginn 29. nóvember.
Mynd vikunnar
Vísitala heildarlauna hækkaði um 7,6% milli 2. ársfjórðungs 2021 og 2. ársfjórðungs í ár. Eins og oft vill verða var þróunin nokkuð ólík eftir því hvort um almenna eða opinbera markaðinn er að ræða og eins eftir atvinnugreinum. Þannig hækkuðu heildarlaun hjá opinberum starfsmönnum nokkuð meira en meðal starfsmanna á almennum vinnumarkaði. Ef við skoðum mismunandi atvinnugreinar sést að hækkunin var mest í greinum tengdum ferðaþjónustu, þ.e. í gististaða- og veitingarekstri og í leigustarfsemi og annarri sérhæfðri þjónustu, sem nær meðal annars til þjónustu ferðaskrifstofa og bílaleigubíla. Minnsta hækkun var í upplýsingum og fjarskiptum og í fasteignaviðskiptum.
Helsta frá vikunni sem leið
- Um 160 þúsund erlendir ferðamenn fóru frá landinu í októbermánuði sem er fjórði mesti fjöldi sem mælst hefur í októbermánuði. Svo virðist sem ferðaþjónustan sé orðin jafn umsvifamikil og áður en heimsfaraldurinn skall á, en október var fjórði mánuðurinn í röð sem það munaði innan við 5% á fjölda erlendra ferðamanna og í sama mánuði 2019. Nokkur breyting hefur orðið á samsetningunni frá því fyrir heimsfaraldurinn, en núna koma hlutfallslega fleiri ferðamenn frá Norður-Ameríku og Bretlandseyjum, en færri frá Austur-Evrópu, Asíu og Eyjaálfu. Brottfarir Íslendinga voru 72 þúsund og hafa aldrei mælst fleiri í októbermánuði. Icelandair og Play birtu síðan flutningstölur fyrir október í síðustu viku.
- Hagstofan birti bráðabirgðatölur um vöruviðskipti í október. Alls var hallinn á vöruviðskiptum við útlönd 53 milljarðar króna. Þetta er mesti halli sem mælst hefur í einum mánuði, en gögn Hagstofunnar ná aftur til ársins 2002. Uppsafnaður halli síðustu tólf mánaða er um 310 milljarðar króna. Það ber þó að hafa í huga að síðustu ár hefur verið halli af vöruviðskiptum og afgangur af þjónustujöfnuði þannig að þessar tölur þýða ekki endilega að það muni verða mikill halli á viðskiptum við útlönd í heild.
- Skráð atvinnuleysi mældist 2,8% í október og var óbreytt milli mánaða. Sem fyrr var atvinnuleysi hæst á Suðurnesjum (4,8%) og á höfuðborgarsvæðinu (3,0%) og lægst á Norðurlandi vestra (0,8%). Fyrir landið í heild var lítill munur á atvinnuleysi karla (2,7%) og kvenna (2,8%), en mesta atvinnuleysið mældist hjá konum á Suðurnesjum (5,6%).
- Hagstofan og Arion banki birtu hagspár í vikunni. Arion banki gerir ráð fyrir 6,0% hagvexti í ár og 1,6% á næsta ári, Hagstofan 6,2% í ár og 1,8% á næsta ári. Í nýjustu hagspá okkar spáðum við 6,5% hagvexti í ár og 2,1% á næsta ári.
- Seðlabankinn birti útreikning á raungengi í október og veltutölur af gjaldeyrismarkaði og krónumarkaði.
- Erlendis bar hæst verðbólgutölur í Bandaríkjunum, en verðbólga þar lækkaði úr 8,2% í 7,7% milli september og október og hefur ekki mælst lægri síðan í janúar. Mælingin var lægri en búist var við og hækkuðu markaðir vestanhafs mikið í kjölfarið.
- Sveitarfélagið Árborg og Reitir fasteignafélag héldu skuldabréfaútboð í síðustu viku. Lánamál ríkisins birtu Markaðsupplýsingar.
- Kvika banki birti árshlutauppgjör.
Hagtölur og markaðsupplýsingar
Þú gætir einnig haft áhuga á
4. ágúst 2026
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
4. ágúst 2026
Gistinóttum á hótelum fækkaði um 0,4% á milli ára í júní. Seðlabanki Bandaríkjanna og Englandsbanki héldu báðir vöxtum óbreyttum í síðustu viku.
27. júlí 2026
Verðbólga jókst úr 5,2% í 5,3% í júlí. Áfram sjást merki um hægagang á fasteignamarkaði en fjölda kaupsamninga um íbúðarhúsnæði hefur fækkað á milli ára á sama tíma og fjöldi íbúða til sölu hefur aukist.
23. júlí 2026
Vísitala neysluverðs hækkaði um 0,36% á milli mánaða og verðbólga hækkar því úr 5,2% í 5,3%. Við spáðum því að verðbólga myndi standa í stað. Að þessu sinni kom enginn undirliður mikið á óvart. Við búumst við að verðbólgan verði áfram yfir 5% næstu þrjá mánuði.
20. júlí 2026
Greiðslukortavelta íslenskra heimila jókst á milli ára, bæði innanlands og erlendis. Verðbólga í Bandaríkjunum lækkaði á milli mánaða, aðallega vegna lægra bensínsverðs.
13. júlí 2026
Ferðamannafjöldinn í júní dróst saman um 4,8% á milli ára og atvinnuleysi mældist 0,6 prósentustigum meira en fyrir ári síðan. Við spáum því að verðbólga í júlí muni mælast óbreytt á milli mánaða og standa í 5,2%.
8. júlí 2026
Við spáum því að verðbólga mælist 5,2% í júlí. Sumarútsölur og lægra bensínverð hafa áhrif til lækkunar í mánuðinum. Flugfargjöld til útlanda munu aftur á móti hafa mest áhrif til hækkunar gangi spá okkar eftir. Við teljum líklegt að verðbólga mælist yfir forsenduákvæði kjarasamninga í næsta mánuði.
6. júlí 2026
Gistinóttum erlendra ferðamanna fjölgaði milli ára í maí, en gistinóttum Íslendinga fækkaði. Færri ný störf urðu til í Bandaríkjunum í júní en búist var við og verðbólga á evrusvæðinu í júní var lægri en búist var við.
1. júlí 2026
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
29. júní 2026
Verðbólga jókst úr 5,1% í 5,2% í júní. Flugfargjöld til útlanda hækkuðu töluvert meira en við gerðum ráð fyrir, en þau eru nú 28% hærri en á sama tíma í fyrra.