Verðbólga rauk úr 4,5% í 5,2% í janúar. Aukin verðbólga skýrist aðallega af hækkun á opinberum gjöldum tengdum bifreiðum. Verð á nýjum bílum hækkaði og kílómetragjald var sett á, en á móti lækkaði verð á bensíni og díselolíu. Samanlagt höfðu þessar breytingar 0,6% áhrif til hækkunar á vísitölunni. Mælingin ber einnig merki um að undirliggjandi verðþrýstingur sé enn til staðar, en matarkarfan hækkaði nokkuð meira en við áttum von á.
Verðbólgutala janúarmánaðar dregur verulega úr líkum á því að peningastefnunefnd haldi vöxtum óbreyttum í febrúar. Við spáum því að peningastefnunefnd hækki vexti um 0,25 prósentustig. Helstu forsendur okkar eru að við teljum horfur á að verðbólga haldist í kringum 5% næstu mánuði, ekki hefur tekist að draga úr verðbólguvæntingum og kaupmáttaraukning heldur áfram að skila sér í aukinni neyslu.
Skýr merki eru um að spenna á vinnumarkaði fari dvínandi. Atvinnuleysi eykst og áfram dregur úr eftirspurn eftir starfsfólki. Þrátt fyrir það eru Íslendingar áfram duglegir að ferðast til útlanda. Íslendingar hafa aldrei farið í eins margar utanlandsferðir og í fyrra og þrátt fyrir fall Play í október hafa utanlandsferðir Íslendinga á lokafjórðungi árs ekki verið fleiri síðan 2018. Heimili landsins standa heilt yfir vel. Sparnaður eykst á innlánsreikningum og ekki eru merki um að vanskil hafi færst í aukana.
Húsnæðismarkaður hefur kólnað á síðustu mánuðum. Nafnverð íbúða hefur hækkað um 2,1% á síðustu tólf mánuðum, vel undir almennu verðlagi, svo raunverðið hefur lækkað á milli ára síðustu tvo mánuði. Greina mátti minni umsvif í kjölfar vaxtadóma Hæstaréttar sem tímabundið ollu meiri óvissu og skertu lánaframboði. Þó sú óvissa sé ekki lengur til staðar er aðgengi að lánsfé enn skert.
Lesa fréttabréfið í heild:
Fyrirvari
Þessi samantekt og/eða umfjöllun er markaðsefni ætlað til upplýsingar en ekki sem grundvöllur viðskipta. Markaðsefni þetta felur hvorki í sér fjárfestingarráðgjöf né óháða fjárfestingargreiningu. Lagakröfur sem gilda um fjárfestingarráðgjöf og fjárfestingargreiningu eiga því ekki við, þ.m.t. bann við viðskiptum fyrir dreifingu.Upplýsingar um þróun gengis innlendra hlutabréfa, skuldabréfa og/eða vísitalna koma frá Nasdaq Iceland – Kauphöllinni. Á vef Landsbankans er hægt að nálgast nánari upplýsingar með því að smella á viðkomandi hlutabréf, skuldabréfaflokk eða vísitölu. Upplýsingar um þróun gengis erlendra fjármálagerninga, vísitalna og/eða sjóða koma frá aðilum sem Landsbankinn hefur metið áreiðanlega. Þróun gengis í fortíð gefur ekki vísbendingu um framtíðarþróun.
Upplýsingar um fyrri árangur sjóða Landsbréfa byggja á upplýsingum frá Landsbréfum. Á vef Landsbankans er hægt að nálgast nánari upplýsingar með því að smella á heiti viðkomandi sjóðs, þ.m.t. um árangur síðastliðinna fimm ára. Upplýsingar um fyrri árangur sjóða sýna nafnávöxtun, nema annað sé tekið fram. Ef fyrri árangur sjóða byggir á erlendum gjaldmiðli getur ávöxtun aukist eða minnkað vegna gengissveiflna. Árangur í fortíð gefur ekki áreiðanlega vísbendingu um framtíðarárangur.
Verðbréfaviðskipti fela í sér áhættu og eru lesendur hvattir til að kynna sér Áhættulýsingu vegna viðskipta með fjármálagerninga og Stefnu Landsbankans um hagsmunaárekstra sem finna má á vef Landsbankans.
Landsbankinn hefur starfsleyfi sem viðskiptabanki samkvæmt lögum nr. 161/2002 um fjármálafyrirtæki og sætir eftirliti Fjármálaeftirlits Seðlabanka Íslands (www.sedlabanki.is/fjarmalaeftirlit).
