Ferðamenn færri en fyrir faraldur en eyða meiru

Tæplega 121 þúsund erlendir ferðamenn lögðu upp frá Keflavíkurflugvelli í janúar, álíka margir og í janúar 2020, rétt áður en ferðatakmarkanir settu strik í reikninginn. Ferðamenn eru þó nokkuð færri en í janúar 2018 og 2019, en eyða að jafnaði meiri pening en þá. Ferðir Íslendinga til útlanda hafa aldrei verið fleiri í janúar en nú, brottfarirnar voru 41.500.

13. febrúar 2023

Brottfarir erlendra ferðamanna voru tæplega 121 þúsund í janúar. Þær voru álíka margar og í janúar 2020, 13% færri en í janúar árið 2019, síðasta árið fyrir faraldur, en fjöldinn á síðustu mánuðum hefur verið mjög sambærilegur því sem var árið 2019. Ferðamenn eru enn þó nokkuð færri en þeir voru á metferðamannaárinu 2018. Nú í janúar var fjöldinn til dæmis 82% af því sem hann var í janúar það ár.

Bretar og Bandaríkjamenn fóru tæplega helming ferðanna um Keflavíkurflugvöll, tæplega 30.000 voru Bretar og rúmlega 28.000 Bandaríkjamenn. Næstfjölmennastir þar á eftir voru Kínverjar (5,1% af heild), Þjóðverjar (4,7%) og Pólverjar (4,3%).

Ferðatakmarkanir til og frá Kína voru nýlegar afnumdar og má gera ráð fyrir að kínverskum ferðamönnum fjölgi á næstu mánuðum. Hlutfall kínverja af heildarfjölda ferðamanna svipar til þess sem var í janúar 2018 og 2019.

Met í brottförum Íslendinga

Íslendingar slógu janúarmet í ferðalögum með 41.500 brottförum frá Keflavíkurflugvelli. Áður voru brottfarirnar flestar í janúar 2019, 40.600 og í janúar 2018 voru þær 39.000. Íslendingar virðast því enn vera að bæta upp fyrir sólarlanda- og skíðaferðir sem þeir slepptu þegar faraldurinn stóð sem hæst. Landsmenn virðast þó einnig hafa gert vel við sig innanlands í mánuðinum en samkvæmt gögnum Rannsóknaseturs verslunarinnar sem birtust fyrr í dag jókst neyslan um rúm 10% að raunvirði milli ára, aðallega vegna aukinna þjónustukaupa. Ein skýring á aukinni neyslu og ferðagleði landsmanna gætu verið nýlega umsamdar launahækkanir.

Erlendir ferðamenn eyða meiru en áður

Ljóst er að hver ferðamaður eyðir meiru á Íslandi en áður, á föstu gengi, sem þýðir að þeir eyða meiru í eigin mynt. Kortavelta ferðamanna nam 16,7 milljörðum í janúar samkvæmt gögnum Rannsóknaseturs verslunarinnar, 117% meiru en í sama mánuði árið áður á föstu gengi og 8% meiru en í janúar árið 2020, þótt ferðamenn hafi verið 5% færri nú en þá. Kortaveltan var jafnmikil og hún var í janúar árið 2019 þótt ferðamenn hafi verið 17% færri nú en þá.

Ferðamenn greiddu rúma fjóra milljarða króna með greiðslukortum fyrir gistiþjónustu í janúar, um 2,5 milljarða í verslun og aðra 2,5 milljarða í veitingaþjónustu. Tæpir tveir milljarðar fóru í leigu á bílum og rúmlega hálfur í menningu, tómstundir og afþreyingu.

Fyrirvari

Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara.

Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti.

Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.

Þú gætir einnig haft áhuga á

25. sept. 2023

Vikubyrjun 25. september 2023

Vísitala íbúðaverðs á höfuðborgarsvæðinu hækkaði um 0,7% milli mánaða í ágúst, samkvæmt gögnum sem HMS birti í síðustu viku. Vísitalan lækkaði þó nokkuð í júní og júlí og hækkunin kom því nokkuð á óvart. Í næstu viku ber hæst birting Hagstofunnar á vísitölu neysluverðs á fimmtudag.

20. sept. 2023

Vísitala íbúðaverðs hækkar lítillega og verðbólguspáin með

Vísitala íbúðaverðs hækkaði um 0,7% milli mánaða í ágúst. Árshækkun vísitölunnar fór úr 0,8% í 2,0%. Undirritaðir kaupsamningar á höfuðborgarsvæðinu voru 9,6% færri í júlí en í sama mánuði í fyrra. Vísitalan er hærri en við gerðum ráð fyrir við gerð verðbólguspár fyrir septembermánuð og því færum við hana upp og spáum 7,8% ársverðbólgu í stað 7,7%.

18. sept. 2023

Aukinn þjónustuútflutningur skýrist allur af vexti ferðaþjónustu

Um 282 þúsund erlendir ferðamenn fóru um Keflavíkurflugvöll í ágúst. Ef sumarmánuðirnir eru teknir saman hafa aðeins einu sinni komið fleiri ferðamenn að sumri, árið 2018. Samkvæmt nýjustu þjóðhagsreikningum Hagstofunnar jókst þjónustuútflutningur á fyrstu tveimur fjórðungum ársins um 21%, og má rekja allan þann vöxt til ferðaþjónustunnar.

18. sept. 2023

Vikubyrjun 18. september 2023

Í síðustu viku komu tölur um brottfarir frá Leifsstöð, skráð atvinnuleysi og veltu greiðslukorta. Í þessari viku ber hæst vísitala íbúðaverðs, sem kemur á þriðjudag, og yfirlýsing fjármálastöðugleikanefndar Seðlabanka Íslands, sem gefin verður út á miðvikudaginn.

15. sept. 2023

Frekari merki um hægari takt

Nýjar kortaveltutölur bera með sér frekari vísbendingar um að verulega sé að hægja á innlendri eftirspurn. Heildarkortavelta íslenskra heimila dróst saman um 3,4% milli ára í ágúst. Kortavelta Íslendinga innanlands var 4,3% minni en í ágúst í fyrra á föstu verðlagi og hefur nú dregist saman sex mánuði í röð. Erlendis jókst kortavelta Íslendinga um 0,7% á milli ára og kortaveltujöfnuður er jákvæður um 19,2 milljarða.

14. sept. 2023

Spáum 7,7% verðbólgu í september

Við spáum því að vísitala neysluverðs hækki um 0,07% milli mánaða í september og að ársverðbólga standi í stað og verði áfram 7,7%. Útsölulok hafa aftur mest áhrif til hækkunar milli mánaða í september samkvæmt spánni. Það sem helst dregur spána niður er árstíðabundin lækkun á flugfargjöldum til útlanda. Við gerum ráð fyrir að verðbólga lækki áfram næstu mánuði og verði 6,6% í desember.

11. sept. 2023

Vikubyrjun 11. september 2023

Í síðustu viku birti Seðlabankinn fundargerð peningastefnunefndar. Samkvæmt henni greiddi einn nefndarmaður atkvæði gegn tillögu seðlabankastjóra um að hækka vexti um 0,50 prósentustig á síðasta fundi nefndarinnar og hefði heldur kosið að hækka þá um 0,25 prósentustig. Í þessari viku berast gögn yfir fjölda brottfara um Leifsstöð, skráð atvinnuleysi og kortaveltu.

4. sept. 2023

Mánaðaryfirlit yfir sértryggð skuldabréf - ágúst 2023

Meðfylgjandi er mánaðarlegt yfirlit um sértryggð skuldabréf.

4. sept. 2023

Vikubyrjun 4. september 2023

Verðbólga jókst úr 7,6% í 7,7% samkvæmt ágústmælingu Hagstofunnar. Hagvöxtur mældist 4,5% á öðrum ársfjórðungi samkvæmt nýjum þjóðhagsreikningum sem Hagstofan birti í vikunni, en hagvöxtur á fyrsta ársfjórðungi mældist 7,1%. Minni vöxtur einkaneyslu skýrir að stórum hluta minni hagvöxt á öðrum ársfjórðungi.

31. ágúst 2023

Hægir á hagvexti og einkaneysla á mann dregst saman

Hagvöxtur mældist 4,5% á öðrum ársfjórðungi, samkvæmt fyrsta mati Hagstofunnar. Eins og við var að búast benda tölurnar til þess að hægt hafi á hagkerfinu, en hagvöxtur mældist 7,1% á fyrsta ársfjórðungi. Vaxtahækkanir hafa tekið að tempra innlenda eftirspurn á sama tíma og hægt hefur á vexti kaupmáttar á síðustu misserum. Einkaneysla jókst örlítið en vegna hraðrar fólksfjölgunar dróst hún saman á mann.

Ferða­menn færri en fyr­ir far­ald­ur en eyða meiru

Met í brottförum Íslendinga

Erlendir ferðamenn eyða meiru en áður

Fyrirvari

Ferðamenn færri en fyrir faraldur en eyða meiru