Fyr­ir­tækja­ráð­gjöf Lands­bank­ans var ráð­gjafi við kaup Styr­kás á Gallon

Styrkás hf. hefur í gegnum dótturfélag sitt Skeljung ehf. undirritað kaupsamning um kaup á öllu hlutafé í Gallon ehf. Seljandi er Skel fjárfestingafélag hf.

Gallon annast móttöku, geymslu og afgreiðslu eldsneytis frá birgðastöðvum félagsins en þar er eldsneytið afgreitt beint um borð í skip og á olíubíla. Félagið rekur birgða- og geymarými á sex stöðum við sjávarsíðuna og sinnir jafnframt geymslu flugeldsneytis á sjö flugvöllum. Birgðastöðin í Örfirisey er með 14 geymslutanka og gegnir lykilhlutverki í starfsemi félagsins. Hjá félaginu starfa sex starfsmenn. Gallon á jafnframt 25% hlut í EBK ehf. sem rekur birgðastöð á Keflavíkurflugvelli og fylgir sá hlutur með í kaupunum. Heildarvirði Gallon í viðskiptunum var 2,9 milljarðar króna.

Styrkás er leiðandi þjónustufyrirtæki á fyrirtækjamarkaði og byggir starfsemin á fjórum kjarnasviðum: orku og efnavöru, tækjum og búnaði, eignaumsýslu og leigustarfsemi og umhverfis- og iðnaðarþjónustu. Dótturfélög Styrkás eru Skeljungur, Klettur, Stólpi og Hreinsitækni. Tilgangurinn með kaupunum á Gallon er að styrkja kjarnasvið Styrkás í orku og efnavörum.

Ráðgjafar kaupanda í viðskiptunum eru Fyrirtækjaráðgjöf Landsbankans og Logos lögmannsþjónusta. Ráðgjafar seljanda í viðskiptunum eru Arma Advisory og BBA // Fjeldco.

Kaupin eru gerð með fyrirvara um samþykki Samkeppniseftirlitsins og samþykki hluthafafundar Styrkás.

Tilkynning um kaupin á vef Styrkás