Rarik sækir 10 milljarða króna í fyrstu grænu skuldabréfaútgáfu félagsins
Rarik ohf. lauk miðvikudaginn 3. júní 2026 útboði á nýjum grænum skuldabréfaflokki, RARIK 100633 GB, þar sem tilboðum að heildarfjárhæð 10 milljarðar króna var tekið. Um er að ræða fyrstu grænu skuldabréfaútgáfu félagsins undir grænni fjármögnunarumgjörð þess.
Alls bárust 34 tilboð að fjárhæð 14,7 milljarðar króna að nafnverði í skuldabréfaflokkinn á ávöxtunarkröfu á bilinu 3,65–3,99%. Tilboðum að fjárhæð 10 milljarðar króna var tekið á ávöxtunarkröfunni 3,77%. Um er að ræða stærsta skuldabréfaútboð hjá fyrirtæki hér á landi í mörg ár sem endurspeglar góðan áhuga fjárfesta á útgáfunni.
Fjármagnið verður nýtt í samræmi við græna fjármögnunarumgjörð Rarik til að fjármagna eða endurfjármagna verkefni sem styðja við orkuskipti, uppbyggingu og endurnýjun dreifikerfis og aðra sjálfbæra orkuinnviði. Umgjörðin hefur hlotið vottun frá Moody’s Ratings og fékk hæstu mögulegu einkunn, SQS1 (Excellent).
Landsbankinn annaðist umgjörð, sölu og kynningu skuldabréfaútgáfunnar fyrir Rarik og kom einnig að gerð grænnar fjármögnunarumgjarðar félagsins. Fyrirtækjaráðgjöf og Markaðsviðskipti bankans höfðu umsjón með útboðinu og munu jafnframt annast skráningu skuldabréfaflokksins á Nasdaq Iceland.
Elísabet Ýr Sveinsdóttir, framkvæmdastjóri fjármála hjá Rarik, segir: „Við erum afar ánægð með árangurinn af fyrstu grænu skuldabréfaútgáfu Rarik og þær góðu viðtökur sem útgáfan fékk. Samstarfið við Landsbankann hefur verið mjög farsælt frá upphafi til enda. Bankinn leiddi okkur af mikilli fagmennsku í gegnum uppsetningu grænu fjármögnunarumgjarðarinnar og alla vinnu við undirbúning útgáfunnar. Sú vinna skilaði þessari frábæru niðurstöðu sem við erum mjög stolt af. Fyrir Rarik er útgáfan mikilvægur áfangi í að tengja fjármögnun félagsins enn betur við þau umfangsmiklu verkefni sem fram undan eru í áframhaldandi uppbyggingu, endurnýjun og styrkingu dreifikerfisins, sem er lykilforsenda orkuskipta og sjálfbærra orkuinnviða um land allt.“
Eyrún Anna Einarsdóttir, framkvæmdastjóri Eignastýringar og miðlunar Landsbankans, segir: „Við erum mjög ánægð með þær viðtökur sem útboðið fékk og þann mikla áhuga sem fjárfestar sýndu fyrstu grænu skuldabréfaútgáfu Rarik. Niðurstaðan undirstrikar traust markaðarins á félaginu og þeim mikilvægu innviðaverkefnum sem fjármögnuð verða með útgáfunni. Við hjá Landsbankanum erum mjög ánægð og stolt af því að hafa komið að þessari fyrstu grænu skuldabréfaútgáfu félagsins sem var afar vel heppnuð á alla mælikvarða.“
Nánari upplýsingar um græna fjármögnunarumgjörð Rarik og sjálfbærniverkefni félagsins má finna á vef þess.
