Lista­há­tíð í Reykja­vík er haf­in – tvær sýn­ing­ar í Lands­bank­an­um

Á opnunarhátíðinni fengu gestir smjörþefinn af viðburðum hátíðarinnar og að henni lokinni leiddu fjórar sveitir Skólahljómsveita Reykjavíkur gesti fram hjá húsi Landsbankans í Reykjastræti að Hörputorgi þar sem flutt var verkið Loftvægi eftir Samúel Jón Samúelsson. Það var mikið um dýrðir, eins og sjá má hér fyrir neðan.

Landsbankinn er stoltur bakhjarl Listahátíðar í Reykjavík sem fer fram dagana 30. maí til 14. júní. Viðburðir verða haldnir víða í borginni og á ýmsum stöðum á landsbyggðinni. Hægt er að nálgast dagskrá hátíðarinnar á www.listahatid.is.

Tvær sýningar á Listahátíð í Reykjavík í húsi Landsbankans

Í tengslum við hátíðina hefur bankinn lánað rými sitt á horni Reykjastrætis 6 undir tvær áhugaverðar listasýningar sem gestir geta skoðað sér að kostnaðarlausu. Sýningarnar eru annars vegar á vegum Sköpunarmiðstöðvarinnar á Austurlandi og hins vegar ljósmyndasýningin Sjónarhorn. Sýningarnar voru opnaðar 1. júní og dyrnar verða opnar daglega kl. 12.00-17.00 á meðan á hátíðinni stendur.

Tíu ára saga Sköpunarmiðstöðvarinnar í verkum 16 listafólks

Á yfirlitssýningu Sköpunarmiðstöðvarinnar á Austurlandi verða sýnd verk eftir 16 listafólk, en öll eiga þau það sameiginlegt að hafa unnið að listsköpun á vinnustofu miðstöðvarinnar.

Sýningin varpar ljósi á tíu ára starf miðstöðvarinnar og þann fjölbreytta vettvang sem hún hefur skapað fyrir listafólk til að þróa hugmyndir sínar og verk. Árið 2025 hlaut Sköpunarmiðstöðin Eyrarrósina, viðurkenningu sem Listahátíð í Reykjavík og samstarfsaðilar veita framúrskarandi menningarstarfi á landsbyggðinni.

Annað sjónarhorn á Ísland

Ljósmyndasýningin Sjónarhorn sameinar verk fimm listafólks sem vinna öll með ljósmyndir. Á sýningunni sýna þau Ísland frá öðru sjónarhorni en oft birtist í hefðbundnum ferðamannamyndum.

Myndirnar beina sjónum okkar að hversdagsleikanum, veðrinu, samfélagslegum atburðum, fólki og umhverfi. Verkin bjóða gestum að staldra við og skoða landið og samfélagið með nýjum augum.

...

Landsbankinn leggur áherslu á að taka þátt í fjölbreyttu menningarstarfi og að skapa vettvang þar sem list og samfélag mætast. Við hvetjum öll áhugasöm til að líta við í Reykjastræti 6 og njóta sýninganna.