Helgi F. Margeirsson nýr útibússtjóri á Sauðárkróki
Helgi F. Margeirsson hefur tekið við sem útibússtjóri Landsbankans á Sauðárkróki. Hann hefur starfað í útibúinu frá árinu 2009, lengst af sem viðskiptastjóri fyrirtækja.
Helgi er með B.Sc.-próf í viðskiptafræði frá Birmingham Southern College í Alabama-ríki í Bandaríkjunum og M.Sc.-próf í fjármálum og alþjóðaviðskiptum frá Háskólanum í Árósum í Danmörku. Hann hefur einnig lokið námi til kennsluréttinda frá Háskólanum á Akureyri og hefur m.a. kennt áfanga í meistaranámi við Fjölbrautaskóla Norðurlands vestra og við Körfuboltaskóla Norðurlands sem hann stofnaði árið 2019.
Alhliða fjármálaþjónusta og öflug starfsemi
Í útibúi Landsbankans á Sauðárkróki er boðið upp á alhliða fjármálaþjónustu fyrir einstaklinga, fjölskyldur, fyrirtæki og stofnanir. Þar er bæði hægt að sækja fjármála- og tryggingaráðgjöf og hraðbanki er aðgengilegur allan sólarhringinn.
Undir útibúið á Sauðárkróki heyra einnig afgreiðslur bankans á Blönduósi, Hvammstanga og Skagaströnd. Alls starfa 12 manns fyrir bankann á þessum stöðum og sinnir starfsfólk bæði störfum í útibúunum og veitir öðrum viðskiptavinum bankans þjónustu, óháð staðsetningu. Markaðshlutdeild Landsbankans á Norðurlandi vestra er sterk og vaxandi.
Þess má geta að Helgi er fæddur og uppalinn á Sauðárkróki. Hann lék sinn fyrsta meistaraflokksleik með Tindastóli aðeins 14 ára gamall og þann síðasta 37 ára með sama liði. Í dag hangir treyjan hans, #8, uppi á heimavelli Tindastóls í Síkinu á Sauðárkróki.
Helgi tekur við stjórn útibúsins af Birgi Rafni Rafnssyni sem hafði verið útibússtjóri bankans á Sauðárkróki frá 2010.
