Jón Þór Gríms­son nýr yf­ir­lög­fræð­ing­ur Lands­bank­ans

Jón Þór Grímsson hefur verið ráðinn yfirlögfræðingur Landsbankans.

Yfirlögfræðingur Landsbankans á mikilvægan þátt í að styðja við hlutverk bankans um að vera traustur banki fyrir farsæla framtíð viðskiptavina. Horft var til þess í ráðningarferlinu að góður yfirlögfræðingur þarf að vera lausnamiðaður, hafa áhuga og skilning á framþróun nútímalegrar bankaþjónustu og ekki síst gæta að jafnvægi milli viðskiptaákvarðana og áhættu.

Jón Þór lauk lögfræðiprófi frá Háskóla Íslands árið 2003 og B.Sc. gráðu í viðskiptafræði frá American University of Rome árið 2000. Hann er auk þess með lögmannsréttindi og  verðbréfaréttindi. Þá hefur hann sótt fjölda námskeiða og verið stjórnarmaður.

Lilja Björk Einarsdóttir, bankastjóri Landsbankans, segir: „Jón Þór hefur skýra og metnaðarfulla sýn á þau tækifæri sem felast í því að þróa áfram lögfræðiþjónustu bankans til stuðnings stefnu hans og markmiðum. Hann hefur öðlast verðmæta reynslu í fjölbreyttum störfum innan bankans, hefur góða yfirsýn yfir fjármálamarkaðinn og mætir sterkur til leiks.“

Yfirlögfræðingur stýrir Lögfræðiþjónustu bankans sem heyrir beint undir bankastjóra og sinnir fjölbreyttri lögfræðiþjónustu og ráðgjöf fyrir svið bankans og bankaráð.