Grunn­skóli Húna­þings vestra bar sig­ur úr být­um í Skóla­hreysti 2026

Grunnskóli Húnaþings vestra sigraði Skólahreysti 2026 eftir spennandi úrslitakeppni sem fram fór að Varmá í Mosfellsbæ laugardaginn 23. maí. Keppnin var æsispennandi og skemmtileg en liðið stóð uppi sem sigurvegari með 60 stig eftir glæsilega frammistöðu í öllum greinum keppninnar.

Í öðru sæti var Laugalækjarskóli og Víðistaðaskóli hafnaði í því þriðja, báðir með 54 stig.

Stemningin í íþróttamiðstöðinni að Varmá var rafmögnuð og keppendur fengu öflugan stuðning frá samnemendum, fjölskyldum og öðrum gestum. Keppt var í fimm greinum þar sem reyndi á styrk, úthald, liðsheild og einbeitingu.

Til úrslita í Skólahreysti 2026 kepptu Álfhólsskóli, Árbæjarskóli, Áslandsskóli, Egilsstaðaskóli, Garðaskóli, Grunnskóli Ísafjarðar, Grunnskóli Húnaþings vestra, Heiðarskóli, Lágafellsskóli, Laugalækjarskóli, Setbergsskóli og Víðistaðaskóli.

Íslandsmet í hreystigreipi

Sérstaka athygli vakti árangur Sögu Björgvinsdóttur, nemanda í Grunnskólanum á Ísafirði, sem sigraði í hreystigreipinni eftir að hafa hangið í 26 mínútur og 31 sekúndu. Árangur hennar er sá næstbesti í sögu Skólahreysti en Saga á einnig Íslandsmetið í greininni, sem hún setti í undanriðli keppninnar í ár þegar hún hékk í 30 mínútur og 9 sekúndur.

Nýir samstarfsaðilar

Landsbankinn er aðalbakhjarl Skólahreysti og hefur stutt keppnina um árabil. Í ár urðu ákveðin straumhvörf, en þrír synir stofnendanna Andrésar og Láru, þeir Axel, Örn og Jökull, taka nú þátt í rekstrinum. Nýir samstarfsaðilar hafa líka bæst í hópinn og aukin áhersla verður framvegis lögð á lýðheilsu í víðari skilningi, hollt og gott mataræði til viðbótar við hreysti og hreyfingu. Við hlökkum til að vinna áfram að sterkri keppni með nýju og öflugu liði.

Við óskum öllum keppendum, þjálfurum og skólum innilega til hamingju með glæsilega keppni og frábæran árangur í vetur.