Lánshæfismat sértryggðra skuldabréfa Landsbankans er tveimur þrepum fyrir ofan lánshæfismat Landsbankans, sem er BBB með stöðugum horfum.
Mat S&P byggir m.a. á þeim sterka lagaramma sem gildir um útgáfu sértryggðra skuldabréfa á Íslandi.
Lilja Björk Einarsdóttir, bankastjóri Landsbankans, segir: „Við fögnum þessum áfanga og þetta mat styrkir sértryggðu skuldabréfin enn frekar sem fjárfestingarkost. Sértryggð skuldabréf eru orðin mikilvægari hluti af fjármögnun bankans í takt við vaxandi markaðshlutdeild Landsbankans í íbúðalánum. Gott lánshæfi skuldabréfanna endurspeglar traustan rekstur bankans og sterka umgjörð um markaðinn með sértryggð skuldabréf.“
Langt og ítarlegt ferli er að baki umsóknar bankans um lánshæfismat vegna sértryggðu skuldabréfanna, enda er S&P í fyrsta sinn að meta íslenskt laga- og reglugerðarumhverfi varðandi sértryggð skuldabréf, tryggingasafn bankans og útgáfuramma sértryggðra skuldabréfa Landsbankans. Þetta er jafnframt í fyrsta sinn sem alþjóðlegt matsfyrirtæki gefur út lánshæfiseinkunn fyrir sértryggð skuldabréf íslensks banka.