Uppgjör og afhending vegna kaupa Landsbankans á TM tryggingum hf. af Kviku banka fór fram í dag og hefur Landsbankinn tekið við rekstri félagsins. TM verður rekið sem dótturfélag Landsbankans.
Lilja Björk Einarsdóttir, bankastjóri Landsbankans segir:
„TM er öflugt tryggingafélag með frábæru starfsfólki sem býr yfir mikilli þekkingu á tryggingamarkaði. Við hlökkum til að vinna með starfsfólki TM að því að þróa spennandi nýjungar. Saman búa Landsbankinn og TM yfir öflugu þjónustu- og söluneti, hvort sem er í gegnum reynslumikið starfsfólk, stafrænar lausnir eða í útibúum um allt land. Við sjáum fyrir okkur gott aðgengi viðskiptavina að vörum og þjónustu beggja félaga sem skapar bankanum og TM mörg tækifæri til sóknar. Við teljum auk þess að kaup bankans á TM muni hafa jákvæð áhrif á rekstur bankans, fjölga tekjustoðum og auka ávinning eigenda bankans til framtíðar. Landsbankinn og TM verða betri saman!“
Birkir Jóhannsson, forstjóri TM, segir:
„Við hjá TM erum virkilega spennt að ganga til liðs við Landsbankann. Viðskiptavinir Landsbankans hafa um árabil verið meðal ánægðustu viðskiptavina á íslenskum bankamarkaði og TM hefur á undanförnum misserum stigið afgerandi skref í átt að sama marki á tryggingamarkaði. Ég er sannfærður um að þegar við snúum bökum saman munu TM og Landsbankinn veita viðskiptavinum sínum framúrskarandi alhliða fjármálaþjónustu, hjálpa þeim að vaxa og dafna og grípa þá þegar áföll verða.“
Umsamið kaupverð samkvæmt kaupsamningi var 28,6 ma. kr. og miðast það við efnahagsreikning TM í upphafi árs 2024. Líkt og fram hefur komið var samið um að endanlegt kaupverð yrði aðlagað miðað við breytingar á efnislegu eigin fé TM frá 1. janúar 2024 til afhendingardags. Hækkun á efnislegu eigin fé TM á tímabilinu 1. janúar 2024 til 31. desember 2024 nemur um 3,7 milljörðum króna (hagnaður tímabilsins, leiðrétt fyrir breytingum á óefnislegum eignum) og er heildarkaupverð með kaupverðsaðlögun til 31. desember 2024 því um 32,3 milljarðar króna. Samkvæmt því er margfeldi kaupverðs af efnislegu eigin fé TM 1,80.
Lokauppgjör vegna kaupverðsaðlögunar mun fara fram þegar endurskoðað uppgjör TM miðað við afhendingardag liggur fyrir og mun koma til hækkunar eða lækkunar á kaupverðinu.
