Erum við að missa fókus?
Það er ekki óalgengt að slíkar svikabylgjur gangi yfir en það er samt áberandi meira um að fólk sé að falla í gildruna núna. Vissulega verða svikatilraunirnar sífellt fágaðri og gervigreindin gerir svikurunum hægara um vik að herma eftir íslenskunni, en það er vert að velta því fyrir sér hvort við séum að slaka á vörnunum á sama tíma og við byrjum að slaka á í sumarsólinni.
Hvað getum við gert til að varast?
Einföld regla er að smella aldrei á hlekki í SMS-um eða tölvupóstum heldur fara beint inn á vefsíðu eða app fyrirtækis og skrá sig þar inn með öruggum hætti. Ef, og þá segi ég EF, við ætlum að smella á hlekk yfir höfuð skiptir lykilmáli að skoða fyrst vel hver sendandinn er, sér í lagi símanúmer eða netfang sendanda.
Ef hlekkurinn inniheldur innskráningu með rafrænum skilríkjum eða að við gefum upp kortaupplýsingar skulum við strax stoppa og athuga hvað við erum að gera. Almennt séð senda alvöru fyrirtæki ekki slíka hlekki í tölvupósti eða SMS-i.
Mikilvægast af öllu því sem við gerum er að þegar við erum að samþykkja innskráningar með rafrænum skilríkjum eða samþykkja greiðslur með rafrænum skilríkjum, PIN-númeri, lífkenni eða öðrum persónubundnum öryggisþáttum, er að lesa vel skilaboðin sem birtast áður en við veitum samþykkið. Í textanum með auðkenningarbeiðninni kemur fram hvaða innskráningu við erum að samþykkja, nú eða hvaða greiðslu, og þá á að koma fram heiti söluaðila og fjárhæð greiðslunnar sem við erum að samþykkja.
Það eitt að gefa sér nokkrar sekúndur til að lesa þessar upplýsingar getur komið í veg fyrir að við verðum fyrir fjártjóni!
Öryggisstillingar korta
Önnur einföld og þægileg leið til að viðhalda sterkum vörnum er að breyta öryggisstillingum korta í takt við eigin þarfir. Í Landsbankaappinu er t.d. hægt að loka fyrir notkun á korti í netverslun, fyrir notkun erlendis og fyrir notkun í hraðbönkum. Það er líka hægt að setja upp vöktun á kortinu, t.d. þannig að við fáum SMS þegar úttekt er gerð án þess að kortið sé til staðar. Ef allt fer á versta veg er líka hægt að loka kortinu í appinu.
Ef þig grunar að þú hafir lent í klóm netglæpamanna hvetjum við þig til að hafa samband við þinn viðskiptabanka sem allra fyrst. Svikavakt Landsbankans er opin frá kl. 9 til 23 alla daga.
