Fyr­ir­tækja­ráð­gjöf Lands­bank­ans ann­ast skrán­ingu Styr­káss

Fyrirtækjaráðgjöf Landsbankans hefur verið valin til að hafa umsjón með skráningu Styrkáss hf. á Aðalmarkað Nasdaq Iceland. Um er að ræða mikilvægt verkefni fyrir Landsbankann en ekki síður fyrir íslenskan hlutabréfamarkað.

Stefnt er að skráningu félagsins á öðrum ársfjórðungi 2027.

Styrkás er rekstrarfélag og hefur frá stofnun 2022 byggt upp öfluga samstæðu með skýra langtímasýn. Dótturfélög þess eru Skeljungur, Klettur, Stólpi og Hreinsitækni. Félagið sameinar þannig leiðandi fyrirtæki sem þjónusta uppbyggingu innviða og atvinnuvega um allt land. Skráning á markað hefur verið opinbert markmið félagsins frá upphafi og er þetta eðlilegt næsta skref í þeirri vegferð.

Skráning Styrkáss eykur einnig fjölbreytni fjárfestingakosta á íslenskum hlutabréfamarkaði og styrkir íslenskan fjármagnsmarkað.

„Markmiðið er að útfæra og stuðla að farsælli skráningu Styrkáss sem nýtist bæði félaginu sjálfu, nýjum hluthöfum og íslenskum hlutabréfamarkaði. Við erum mjög ánægð með það traust sem okkur er sýnt og hlökkum til að leiða Styrkás í gegnum næsta kafla í þeirra sögu og bjóða nýja hluthafa velkomna að ári,“ segir Elvar Þór Karlsson, forstöðumaður Fyrirtækjaráðgjafar Landsbankans.