Bláa Lónið hefur lokið hlutafjárútboði
Almennu hlutafjárútboði Bláa Lónsins hf. lauk kl. 16:00 þann 13. nóvember. Alls bárust tæplega 4 þúsund áskriftir að andvirði um 15,3 ma. kr.
- Heildarfjöldi seldra hluta í útboðinu nam alls 150 milljónum hluta, heildarsöluandvirði útboðsins nam tæpum 14,3 milljörðum króna og endanlegt gengi 95 kr. á hlut.
- Skerðing áskrifta var í samræmi við skilmála útboðsins.
- Upplýsingar um úthlutun er hægt að nálgast á útboðsvef.
Fjárfestum verður tilkynnt um úthlutun í útboðinu eigi síðar en 16. nóvember. Gjalddagi áskriftarloforða er 18. nóvember og er ráðgert að afhending hinna nýju hluta til fjárfesta fari fram eigi síðar en 20. nóvember.
Stefnt er að því að viðskipti með hlutabréf félagsins á Aðalmarkaði Nasdaq Iceland hefjist þann 20. nóvember, en Nasdaq Iceland hefur samþykkt umsókn félagsins um töku hlutabréfanna til viðskipta með fyrirvara um dreifingu hlutafjár fyrir fyrsta viðskiptadag. Útistandandi hlutir Bláa Lónsins í kjölfar útboðs nema 1.024.763.489 hlutum.
Landsbankinn og Fossar fjárfestingarbanki höfðu umsjón með almenna útboðinu og Landsbankinn með töku hlutabréfa félagsins til viðskipta á Aðalmarkaði Nasdaq Iceland.
Grímur Sæmundsen, stjórnarformaður Bláa Lónsins:
„Þetta eru stór tímamót fyrir Bláa Lónið, íslenska ferðaþjónustu og fyrir Kauphöllina. Félagið hefur verið byggt upp skref fyrir skref frá árinu 1992 og ég hef mikla trú á framtíð þess og tækifærunum framundan fyrir Ísland. Með nýjum hluthöfum höldum við áfram að byggja upp íslenska upplifunar- og vellíðunarferðaþjónustu, með virðingu fyrir náttúrunni og í samvinnu við nærsamfélög. Það er sérstaklega ánægjulegt hversu margir Íslendingar vilja eiga hlut í Bláa Lóninu, það skiptir okkur miklu máli í þeirri vegferð sem er fram undan.” segir Grímur Sæmundsen, stofnandi og stjórnarformaður Bláa Lónsins.“
Sigríður Margrét Oddsdóttir, forstjóri Bláa Lónsins:
„Við þökkum fjárfestum traustið og bjóðum fjögur þúsund nýja hluthafa velkomna. Við höfum skýra sýn á uppbygginguna fram undan: að þróa upplifanir um land allt og leiða áfram þá uppbyggingu sem staðsetur Ísland sem einn fremsta upplifunar- og vellíðunaráfangastað heims. Með breiðari hópi hluthafa erum við vel í stakk búin til að fylgja þeirri sýn eftir. Við erum í raun bara rétt að byrja,“ segir Sigríður Margrét Oddsdóttir, forstjóri Bláa Lónsins.“
