Landsbankinn ráðgjafi við sölu á Nicetravel
Fyrirtækjaráðgjöf Landsbankans annaðist ráðgjöf við sölu á öllu hlutafé í Nicetravel ehf., einu af leiðandi fyrirtækjum landsins á sviði skipulagðra hópferða fyrir erlenda ferðamenn. Það var hópur íslenskra fjárfesta sem festi kaup á félaginu.
Stofnendur Nicetravel, Tryggvi Þór Ágústsson og Stefán Þór Gunnarsson, munu starfa með nýjum eigendum á næstu mánuðum til að tryggja hnökralaus eigendaskipti og farsæla yfirfærslu rekstrarins.
Engilbert Hafsteinsson fer fyrir hópi nýrra eigenda og tekur hann jafnframt við starfi framkvæmdastjóra félagsins.
Nicetravel var stofnað árið 2012 og sérhæfir sig í ferðalögum fyrir litla hópa þar sem lögð er áhersla á persónulega þjónustu, gæði, öryggi og einstaka upplifun af íslenskri náttúru.
Félagið hefur vaxið jafnt og þétt frá stofnun og veltir í dag yfir tveimur milljörðum króna á ári með góðri rekstrarafkomu. Reksturinn byggir á öflugum mannauði og flotastýringu, háu hlutfalli eigin sölu og skýru viðskiptamódeli sem hefur skapað traustan grunn fyrir áframhaldandi vöxt.
Ráðgjafar seljanda voru fyrirtækjaráðgjöf Landsbankans og Magna lögmenn. Ráðgjafar kaupanda voru Arion banki og Nordik lögfræðiþjónusta.
Mynd: F.v. Valur Fannar Þórsson, fyrirtækjaráðgjöf Arion banka, Jóhann Einarsson, fyrirtækjaráðgjöf Arion banka, Engilbert Hafsteinsson, fjárfestir, Stefán Þór Gunnarsson, stofnandi og fráfarandi rekstrarstjóri Nicetravel, Tryggvi Þór Ágústsson stofnandi og fráfarandi framkvæmdastjóri Nicetravel, Guðrún Nielsen, fyrirtækjaráðgjöf Landsbankans, Einar Snær Ásbjörnsson, fyrirtækjaráðgjöf Landsbankans.
