S&P hækk­ar láns­hæf­is­mat Lands­bank­ans í A-

Hækkun á lánshæfismatinu er á grundvelli aukins viðnámsþróttar (e. additional loss absorbing capacity, ALAC). Enn fremur eru lánshæfiseinkunnir fyrir skuldir sem njóta verndar í skilameðferð (e. resolution counterparty ratings, RCR) til lengri og skemmri tíma hækkaðar úr A-/A-2 í A/A-1.

Lánshæfismatið er með stöðugar horfur.

Í rökstuðningi sínum vísar S&P til stöðu skulda bankans með aukinni tapgleypni (e. ALAC buffer) í kjölfar útgáfu víkjandi forgangsskuldabréfa þar sem bankinn sýndi fram á traust markaðsaðgengi. S&P gerir ráð fyrir að Landsbankinn muni viðhalda hlutfalli ALAC-hæfra skulda yfir 4% viðmiði og S&P áhættuvegnu eiginfjárhlutfalli (e. risk adjusted capital ratio, RAC) yfir 15% næstu tvö árin, ásamt því að viðhalda sterkri stöðu, góðri tekjuöflun og traustum eignagæðum.

Lilja Björk Einarsdóttir, bankastjóri Landsbankans, segir:

„Við erum hæstánægð með hækkun á lánshæfiseinkunn Landsbankans upp í A-flokk hjá S&P Global Ratings. Lánshæfiseinkunn er til marks um traustan rekstur og gott aðgengi bankans að innlendum og erlendum fjármagnsmörkuðum.

Undanfarin ár hefur Landsbankinn unnið markvisst að því að auka hagkvæmni fjármagnsskipunar bankans og mæta auknum kröfum í regluverki kerfislega mikilvægra fjármálafyrirtækja. Við höfum meðal annars gefið út eiginfjárgerninga sem telja til viðbótar eiginfjárþáttar 1 og nú síðast gáfum við út víkjandi forgangsbréf í erlendri mynt. Bankinn er vel fjármagnaður erlendis og innanlands og í sterkri stöðu til að styðja við sína viðskiptavini.“

Nánari upplýsingar eru í tilkynningu S&P sem aðgengileg er á vef bankans.