10 milljónir í námsstyrki
Landsbankinn hefur opnað fyrir umsóknir um námsstyrki fyrir árið 2026. Bankinn hefur stutt efnilegt námsfólk með styrkjum um 36 ára bil og í ár var ákveðið að hækka heildarupphæð námsstyrkjanna um tvær milljónir. Heildarupphæð námsstyrkja í ár er því 10 milljónir.
Námsstyrkirnir skiptast í fjóra flokka: framhaldsskóla, grunnám í háskóla, listnám og framhaldsnám í háskóla. Styrkirnir standa til boða hvort sem námsfólk stefnir á nám á Íslandi eða í erlendis.
Dómnefndin leitast við að velja metnaðarfullt, framúrskarandi námsfólk með athyglisverða framtíðarsýn sem talið er líklegt til að auðga íslenskt samfélag. Einnig er litið til annarra atriða við val á styrkþegum, svo sem sjálfboðastarfs og þátttöku í íþróttum og í félagsstarfi.
Landsbankinn leggur ríka áherslu á að vera jákvætt hreyfiafl um allt land. Það gerum við meðal annars með því að styðja við frumkvöðlastarf, íþróttir, menningu og listir til viðbótar við sjálfbærni, góðgerðarmál og menntamál.
Sara Pálsdóttir, framkvæmdarstjóri Samskipta og menningar, segir: „Landsbankinn vill standa við bakið á efnilegu námsfólki og hjálpa því að einbeita sér að náminu. Við lítum á námsstyrkina sem fjárfestingu í framtíðinni fyrir samfélagið allt. Í fyrra fengum við mikið af sterkum umsóknum og vonum að það verði einnig raunin í ár. Það er frábært að sjá hvað það er mikið af öflugu og hæfileikaríku ungu fólki sem hefur metnað til góðra verka.“
Umsóknafrestur fyrir árið 2026 er til og með 23. mars. Landsbankinn hvetur allt námsfólk til að kynna sér styrkina og sækja um.
