Vör­um við svikasím­töl­um

Símtölin virðast koma úr íslenskum símanúmerum en svikararnir eru enskumælandi. Þeir hafa meðal annars sagst vera að bjóða upp á fjárfestingartækifæri í rafmynt, tilkynna að viðmælandinn eigi eignir í rafmynt eða bjóða fólki að fá greitt fyrir að vera milliliðir í fjárfestingum í rafmynt.

Svikararnir hafa fengið fólk til að hlaða niður forritinu AnyDesk á tækin sín en með því fá svikararnir fullan aðgang að tækinu. Einnig hefur fólk verið gabbað til að gefa upp leyninúmer rafrænna skilríkja og hafa svikararnir nýtt þær upplýsingar til að skrá sig inn í bankaapp viðkomandi, millifært út af reikningum og samþykkt greiðslukortafærslur. Þá hefur borið á að svikararnir noti greiðslukortaupplýsingar fólks til að kaupa rafmynt en þar með tapast fjármunirnir.

Málið er enn að skýrast og við munum uppfæra þessa frétt ef þörf krefur.

Vegna svikanna viljum við ítreka eftirfarandi:

• Taktu öllum símtölum eða skilaboðum sem snúast um að kynna fyrir þér einfaldar leiðir til að græða peninga með miklum fyrirvara.
• Ef þú telur að sá sem hringdi í þig sé að reyna að blekkja þig, skaltu strax slíta samtalinu. Það hefur ítrekað komið í ljós að eftir því sem fólk ræðir lengur við svikarana, því meiri hætta er á að það láti blekkjast og tjónið verði meira.
• Fara skal varlega í notkun á rafrænum skilríkjum og aldrei gefa öðrum upp leyninúmer fyrir rafræn skilríki. Enginn annar en þú á að vita leyninúmerið fyrir rafrænu skilríkin þín.
• Forritið AnyDesk, og fleiri forrit af sama toga, gefa utanaðkomandi fullan aðgang að tölvu eða síma sé búið að hlaða því niður á tækið og samþykkja aðgang. Ekki dugir að eyða forritinu út heldur getur þurft að fá fagmann til að tryggja að engin óværa leynist í tölvunni.
• Aldrei samþykkja innskráningar, millifærslu, kortafærslu eða aðrar aðgerðir í netbanka/appi nema þú sért raunverulega að framkvæma þessar aðgerðir.

Ef þú telur þig hafa orðið þolandi svika er mikilvægt að láta bankann þinn og lögreglu vita sem fyrst. Nánari upplýsingar eru á landsbankinn.is/oryggi.

Málið er enn að skýrast og við munum uppfæra þessa frétt ef þörf krefur. Ekkert lát virðist vera á þessum svikum og því viljum við ítreka þessi varnaðarorð.

Fréttin var fyrst birt 10. september 2024 og uppfærð 21. júlí 2026.