Einfalt að stilla sameiginlega sýn á fjármálin í appinu
Nú getur þú notað Landsbankaappið til að velja hvort þú veitir öðrum skoðunaraðgang að fjármálunum þínum eða leyfi til að framkvæma helstu aðgerðir fyrir þína hönd. Þú getur einnig fellt aðgangsheimildir niður með einföldum hætti.
Aðgangsheimildir í sjálfsafgreiðslu í appi er ný þjónusta sem getur nýst hjónum eða fólki í skráðri sambúð sem vilja hafa sameiginlega sýn á fjármálin og fleirum.
Að veita öðrum aðgangsheimild felur í sér að þú veitir viðkomandi umboð til þess að sjá eða framkvæma aðgerðir fyrir þína hönd. Viðkomandi getur fengið heimild til að sjá upplýsingar um reikninginn þinn, kortin þín, ógreiddar kröfur, rafræn skjöl eða verðbréf. Viðkomandi getur líka fengið heimild til að greiða af reikningnum þínum og kaupa og selja verðbréf fyrir þína hönd.
Þú skalt ekki veita öðrum aðgangsheimild nema þú þekkir og treystir viðkomandi vel. Ástæðan er sú að ef þú veitir öðrum aðgangsheimild ert þú að veita viðkomandi leyfi til þess að skoða upplýsingar um þig og, ef viðkomandi fær millifærsluheimild, að heimila viðkomandi að greiða af þínum reikningi. Það er því mikilvægt að þú íhugir vandlega hvort þú þurfir og viljir veita öðrum aðgangsheimild áður en þú gerir það.
Aðgangsheimildir í appinu eru aðgengilegar undir Stillingar -> Aðgangsheimildir. Þar sérðu upplýsingar um aðgangsheimildir sem þú hefur veitt og getur líka afturkallað heimildir.
