Vörum við tölvupósti með hlekk yfir á falska innskráningarsíðu
Við vörum við tölvupóstum sem sendir hafa verið út í nafni Landsbankans. Í póstinum eru viðtakendur beðnir um að skoða upplýsingar um debetkortafærslur með því að smella á hlekk sem vísar þeim yfir á falsaða innskráningarsíðu fyrir netbankann.
Í þessu tilviki kemur pósturinn frá netfangi sem við fyrstu sýn getur virst vera hjá bankanum. Þegar betur er að gáð sést að svo er ekki, því að í stað þess að netfangið endi á @landsbankinn.is endar það á @landbankinnn.is.
Við sendum aldrei tölvupóst eða SMS með hlekk yfir á innskráningarsíðu netbankans.
Ef þú hefur opnað hlekkinn og skráð þig inn á fölsku síðuna þá eru svikararnir komnir með aðgangsupplýsingarnar þínar. Þá er mikilvægt að þú skráir þig inn með venjulegum hætti, í appinu eða með því að fara á vef bankans og skrá þig inn í netbankann, og breytir lykilorðinu strax.
Þú skalt líka hafa samband við okkur, með því að hringja í s. 410 4000, senda okkur póst á landsbankinn@landsbankinn.is eða í gegnum netspjallið á www.landsbankinn.is.
