25. október 2021 - Greiningardeild
Vikan framundan
- Á þriðjudag birtir Hagstofan veltu samkvæmt virðisaukaskattskýrslum í júlí og ágúst. Síminn birtir uppgjör.
- Á miðvikudag birtir Hagstofan októbermælingu vísitölu neysluverðs. Við spáum 4,5% verðbólgu. Arion banki og Íslandsbanki birta uppgjör.
- Á fimmtudag birtir Hagstofan niðurstöður úr mánaðarlegri vinnumarkaðsrannsókn sinni. Eik, Festi, Landsbankinn, Sjóvá og Skeljungur birta uppgjör.
- Á föstudag birtir Hagstofan fjöldi gistinátta í september.
Mynd vikunnar
Efnahagsbatinn er hafinn af fullum krafti og horfur eru á kröftugum hagvexti 2021 og 2022. Ferðaþjónustan er vöknuð úr dvala, horfur eru á sérstaklega góðri loðnuvertíð og atvinnuleysi heldur áfram að minnka. Þrálát verðbólga mun knýja á um töluverða hækkun stýrivaxta, áður en aðstæður skapast til að lækka þá á nýjan leik. Þetta er meðal þess sem kemur fram í nýrri þjóðhags- og verðbólguspá sem við kynntum í síðustu viku.
Efnahagsmál
- Seðlabankinn birti í síðustu viku fundargerð peningastefnunefndar vegna ákvörðunarinnar 6. október. Tveir nefndarmenn, Gunnar Jakobsson og Gylfi Zoëga, greiddu atkvæði gegn tillögu seðlabankastjóra um að hækka vexti bankans um 0,25 prósentustig og vildu hækka vexti bankans um 0,5 prósentustig. Þetta er í fyrsta sinn síðan í febrúar 2020 sem nefndarmaður greiðir atkvæði gegn tillögu seðlabankastjóra á fundi peningastefnunefndar.
- Vísitala íbúðaverðs á höfuðborgarsvæðinu hækkaði um 1,2% milli mánaða í september sem verður að teljast veruleg hækkun. Árshækkunin mælist 16,4%, þar af er árshækkun sérbýlis 21,1% og fjölbýlis 15,2%. Íbúðasala var hins vegar minni en á fyrri mánuðum árs og því mögulega einhver merki um að markaðurinn sé að róast. Vísitala leiguverðs lækkaði um 0,8% milli mánaða og mælist 2,6% árshækkun á leiguverði.
- Launavísitalan hækkaði um 0,7% milli mánaða. Árshækkun vísitölunnar er 7,7% og árshækkun kaupmáttur launa er 3,3%.
- Hagstofan áætlar að 8.300 störf hafi verið laus á 3. ársfjórðungi.
Fjármálamarkaðir
- Hagar (fjárfestakynning), Icelandair (fjárfestakynning), Marel (fjárfestakynning), Origo og VÍS (fjárfestakynning) birtu uppgjör í síðustu viku.
- Reitir, Lánasjóður sveitarfélaga, Kvika, Brim og Lánamál ríkisins seldu skuldabréf.
- Kvika banki birti afkomuviðvörun.
- S&P staðfesti óbreytt lánshæfismat Arion banka og Landsbankans.
Hagtölur og markaðsupplýsingar
Þú gætir einnig haft áhuga á
11. des. 2025
Við spáum því að vísitala neysluverðs hækki um 0,56% á milli mánaða í desember. Gangi spáin eftir mun verðbólga hækka úr 3,7% í 3,9% í desember. Flugfargjöld til útlanda, reiknuð húsaleiga og lok tilboðsdaga í nóvember verða til hækkunar en bensínverð til lækkunar. Við gerum ráð fyrir að verðbólga verði á bilinu 3,9% til 4,0% næstu mánuði.
8. des. 2025
Talsvert minni afgangur mældist af viðskiptum við útlönd á þriðja ársfjórðungi þessa árs en þess síðasta. Í síðustu viku gaf Seðlabankinn út yfirlýsingu fjármálastöðugleikanefndar og fundargerð peningastefnunefndar. Í þessari viku verða birtar ferðamannatölur og skráð atvinnuleysi fyrir nóvembermánuð.
1. des. 2025
Mánaðarlegt fréttabréf frá Greiningardeild um nýjustu hagtölur og stöðu og horfur í efnahagsmálum.
1. des. 2025
Óhætt er að segja að verðbólgumælingin í síðustu viku hafi komið á óvart. Verðbólga mældist 3,7% í nóvember og hefur ekki mælst minni í fimm ár. Hagstofan áætlar að landsframleiðsla hafi aukist um 1,2% á þriðja ársfjórðungi. Gistinóttum fjölgaði alls um 1,8% á milli ára í október.
28. nóv. 2025
Landsframleiðsla jókst um 1,2% á þriðja ársfjórðungi og um 1,5% á fyrstu níu mánuðum ársins. Hagvöxtur á þriðja ársfjórðungi var drifinn áfram af innlendri eftirspurn og þjóðarútgjöld jukust um heil 4,7%. Áfram er kraftur í einkaneyslu og fjárfestingu, en auknar birgðir hafa einnig sitt að segja. Innflutningur vegur þungt á móti og framlag utanríkisviðskipta er neikvætt, líkt og á síðustu fjórðungum.
27. nóv. 2025
Verðbólga hjaðnaði úr 4,3% í 3,7% í nóvember og hefur ekki verið minni frá því í desember 2020. Áhrif af afsláttardögum í nóvember komu mun skýrar fram í mælingu Hagstofunnar nú en síðustu ár og flugfargjöld til útlanda lækkuðu mun meira en við bjuggumst við.
24. nóv. 2025
Seðlabankinn lækkaði vexti í síðustu viku með það fyrir augum að stemma stigu við því aukna peningalega aðhaldi sem hefur hlotist af breyttu lánaframboði í kjölfar vaxtadómsins. Auk þess spáir Seðlabankinn nú auknum slaka í hagkerfinu, minni hagvexti og minni verðbólgu en í síðustu spá. Hagstofan birtir verðbólgumælingu nóvembermánaðar á fimmtudaginn og þjóðhagsreikninga fyrir þriðja ársfjórðung á föstudaginn.
21. nóv. 2025
Brottfarir erlendra ferðamanna frá Keflavíkurflugvelli voru 6,2% færri í október en í sama mánuði í fyrra og erlend kortavelta dróst þó nokkuð saman. Líklega hefur fall Play sett mark sitt á mánuðinn. Ef horft er yfir árið í heild hefur gangurinn í ferðaþjónustu verið mun meiri á þessu ári en því síðasta.
17. nóv. 2025
Skráð atvinnuleysi var 3,9% í október, 0,5 prósentustigum meira en í sama mánuði í fyrra. Brottförum erlendra ferðamanna um Keflavíkurflugvöll fækkaði um 6,2% í október en utanlandsferðum Íslendinga fjölgaði um 3%. Peningastefnunefnd kemur saman á miðvikudaginn og við búumst við að stýrivöxtum verði haldið óbreyttum.
14. nóv. 2025
Við spáum því að peningastefnunefnd haldi stýrivöxtum óbreyttum í næstu viku. Verðbólga jókst umfram væntingar í október og verðbólgumælingin bar þess merki að undirliggjandi verðþrýstingur hefði aukist. Í ljósi breytts lánaframboðs og óviðbúinna áfalla í útflutningsgeirunum má líkast til búast við mildari tón frá peningastefnunefnd.