Aft­ur opið fyr­ir um­sókn­ir um sér­eign­ar­sparn­að inn á hús­næð­is­lán

Skatturinn hefur á ný opnað umsóknir um að ráðstafa viðbótarlífeyrissparnaði skattfrjálst inn á húsnæðislán. Með úrræðinu getur þú nýtt bæði eigið framlag og mótframlag launagreiðanda til að greiða niður lánið þitt. Sótt er um á þjónustuvef Skattsins.

Samkvæmt nýjum reglum er hægt að nýta úrræðið í samanlagt allt að tíu ár, eða sem nemur 120 mánuði. Fyrri nýting skattfrjálsra úrræða vegna húsnæðis telst með í því tímabili. Þegar þú skráir þig inn á þjónustuvefinn sérðu hversu marga mánuði þú átt eftir. 

Hverjir geta sótt um?

Til að nýta úrræðið þarft þú að eiga að minnsta kosti 30% hlut í húsnæðinu, vera með lögheimili þar og vera með lán sem er tryggt með veði í eigninni. Úrræðið er því ekki bundið við fyrstu íbúðarkaup. Hjón og sambúðarfólk þurfa að sækja um hvort fyrir sig.

Hámarksfjárhæð á einstakling er 500.000 kr. á árinu 2026 miðað við tólf mánaða ráðstöfun. Þar af getur eigið framlag verið allt að 333.000 kr. og mótframlag launagreiðanda allt að 167.000 kr. Hámarksfjárhæðir taka framvegis breytingum árlega í samræmi við vísitölu neysluverðs.

Sæktu um fyrir 1. desember vegna iðgjalda frá áramótum

Hægt er að ráðstafa iðgjöldum afturvirkt frá árslokum 2025. Umsóknir sem berast fyrir 1. desember 2026 geta gilt um iðgjöld frá 1. janúar 2026. Að öðru leyti gilda umsóknir um iðgjöld sem greidd eru eftir að umsókn berst.

Á Ísland.is má finna nánari upplýsingar um skilyrði úrræðisins, svör við algengum spurningum og hlekk á umsóknina.