Lands­bank­inn ráð­gjafi Bláa Lóns­ins

Fyrirtækjaráðgjöf Landsbankans hafði umsjón með ráðgjöf til Bláa Lónsins hf. vegna kaupa félagsins á Arctic Adventures hf. og aukinnar fjárfestingar í þremur baðlónum.

Viðskiptin voru samþykkt á hluthafafundi Bláa Lónsins föstudaginn 24. júlí.

Landsbankinn verður Bláa Lóninu einnig til ráðgjafar við fyrirhugaða skráningu félagsins á íslenskan hlutabréfamarkað.

Kaup á Arctic Adventures hf.

Landsbankinn var ráðgjafi við kaup Bláa Lónsins á öllu hlutafé í Arctic Adventures hf. Með þessum stefnumarkandi viðskiptum hyggst Bláa Lónið styðja við áframhaldandi uppbyggingu félagsins og bæta við öflugu fyrirtæki á sviði ferða- og afþreyingarþjónustu.

Bláa Lónið hf. er móðurfélag sterkra fyrirtækja sem eru leiðandi hvert á sínu sviði og er áherslan á upplifunarferðaþjónustu, heilsu og vellíðan, húðvörur og þróun sjálfbærra áfangastaða. Starfsemin byggir á áralangri reynslu af rannsóknum, hönnun og nýsköpun með virðingu fyrir náttúrunni að leiðarljósi.

Aukin fjárfesting í þremur baðlónum

Landsbankinn veitti jafnframt ráðgjöf vegna aukinnar fjárfestingar Bláa Lónsins í Norðurböðum hf. sem er hluthafi í Jarðböðunum á Mývatni og Sjóböðunum á Húsavík. Jarðböðin eru jafnframt hluthafi í Vök við Egilsstaði.

Markmið viðskiptanna er að styrkja grunnrekstur Bláa Lónsins á fjölbreyttum áfangastöðum á Íslandi og auka áhættudreifingu í rekstri félagsins. Fjárfestingin er liður í áframhaldandi áherslu á hágæða upplifun og vellíðan í vexti félagsins til framtíðar.

Viðskiptin eru enn háð fyrirvörum, m.a. samþykki Samkeppniseftirlitsins.