Landsbankinn uppfærir persónuverndaryfirlýsingu
Landsbankinn hefur endurskoðað og uppfært persónuverndaryfirlýsingu sína. Með uppfærslunni hefur heiti skjalsins verið breytt úr persónuverndarstefnu í persónuverndaryfirlýsingu. Yfirlýsingin er aðgengileg á vef bankans og hvetjum við viðskiptavini til að kynna sér efni hennar.
Í persónuverndaryfirlýsingunni er meðal annars fjallað um hvaða persónuupplýsingar bankinn vinnur, í hvaða tilgangi vinnslan fer fram, hvaðan upplýsingar eru fengnar, hverjum þær kunna að vera afhentar og hvaða réttindi einstaklingar hafa samkvæmt persónuverndarlögum.
Markmiðið með uppfærslunni er að veita gagnsæjar og aðgengilegar upplýsingar um vinnslu persónuupplýsinga hjá bankanum. Meðal efnislegra breytinga er umfjöllun um notkun gervigreindar, vinnslu persónuupplýsinga í tengslum við markaðssetningu, vildarflokkun og sérsniðna þjónustu, auk vinnslu í tölfræðilegum tilgangi. Jafnframt hefur verið bætt við umfjöllun um vinnslu persónuupplýsinga í tengslum við hlutverk bankans sem umboðsmanns vátrygginga fyrir TM.
Viðskiptavinir geta nýtt sér réttindagátt bankans til að nálgast upplýsingar um vinnslu persónuupplýsinga og eftir atvikum óskað eftir aðgangi að upplýsingum sínum eða nýtt önnur réttindi samkvæmt persónuverndarlögum.
Fyrirspurnum, athugasemdum og ábendingum sem varða vinnslu persónuupplýsinga má beina til persónuverndarfulltrúa Landsbankans á netfangið personuvernd@landsbankinn.is.
