Lauf­ey Rún Ket­ils­dótt­ir ráð­in til Lands­bank­ans

Laufey Rún Ketilsdóttir hefur verið ráðin sérfræðingur í samskiptum og miðlun hjá nýrri deild Landsbankans, Upplýsingamiðlun. Deildin gegnir lykilhlutverki í að efla samræmda og stefnumiðaða upplýsingamiðlun bankans.

Laufey Rún er lögfræðingur að mennt frá Háskólanum í Reykjavík (ML) og Háskóla Íslands (BA). Hún hefur víðtæka reynslu af upplýsinga-, kynningar- og samskiptamálum. Undanfarin ár var Laufey Rún upplýsingafulltrúi hjá Samtökum fyrirtækja í sjávarútvegi, verkefnastjóri og aðstoðarmaður þingflokks á Alþingi, aðstoðarmaður dómsmálaráðherra og blaðamaður á Morgunblaðinu. Samhliða námi og starfi hefur Laufey Rún einnig sinnt ýmsum félagsstörfum á sviði stjórnmála.

Staðan var auglýst í apríl og var Laufey Rún valin úr stórum hópi umsækjenda.

Laufey Rún hefur þegar hafið störf.