Alfa Fram­tak kaup­ir Nóa Síríus

Alfa Framtak hefur samið við Orkla Snacks um kaup á öllu hlutafé í Nóa Síríus.

AF3, sjóður í rekstri Alfa Framtaks, hefur gengið frá samkomulagi við Orkla Snacks um kaup á öllu hlutafé í Nóa Síríus. Við kaupin færist Nói Síríus aftur í innlenda eigu eftir árangursríkan tíma undir eignarhaldi Orkla Snacks. Viðskiptin eru háð samþykki Samkeppniseftirlitsins.

Nói Síríus hf. var stofnað árið 1920 og er eitt þekktasta framleiðslu- og markaðsfyrirtæki landsins. Fyrirtækið hefur frá stofnun sinnt framleiðslu og dreifingu á súkkulaði og öðrum matvörum. Orkla Snacks hefur umbreytt fyrirtækinu úr rótgrónu fjölskyldufyrirtæki í framsýnt framleiðslufyrirtæki með skýra áherslu á gæði og sterk vörumerki. Alfa Framtak mun byggja á þessum sterka grunni og styðja við næsta vaxtarskeið félagsins.

Alfa Framtak rekur sérhæfða sjóði og býr yfir víðtækri reynslu af fjárfestingu, vexti og umbreytingarstarfi. Markmið Alfa Framtaks er að hámarka verðmæti fjárfestinga og skila fyrirtækjum sterkari af sér við sölu til að marka jákvæð spor í íslensku viðskiptalífi. Í dag eru þrír sjóðir í rekstri Alfa Framtaks, þ.e. AF1, AF2 og AF3. Áskriftarloforð eru samtals um 45 milljarðar króna.

Fyrirtækjaráðgjöf Landsbankans og LOGOS voru ráðgjafar seljanda í viðskiptunum. Ráðgjafar kaupanda voru BBA//FJELDCO og KPMG.

Á myndinni eru frá vinstri: Rolf Arn­ljot Strøm, fjár­mála­stjóri Orkla Snacks, Sigríður Hrefna Hrafn­kelsdóttir, for­stjóri Nói Síríus og Markús Hörður Árna­son, fjár­festingar­stjóri hjá Alfa Fram­tak.