Affineva með Gul­legg­ið 2026 í hönd­un­um

Teymið Affineva stóð uppi sem sigurvegari í lokakeppni Gulleggsins 2026, stærstu og elstu frumkvöðlakeppni Íslands. Sara Pálsdóttir, framkvæmdastjóri Samfélags og menningar, afhenti teyminu vegleg peningaverðlaun fyrir hönd Landsbankans sem hefur um árabil verið aðalbakhjarl keppninnar.

Keppnin er haldin af KLAK – Icelandic Startups og hefur frá árinu 2008 verið mikilvægur stökkpallur fyrir frumkvöðla með verkefni á hugmyndastigi. Fjöldi sprotafyrirtækja sem nú hafa náð langt á innlendum og erlendum markaði stigu sín fyrstu skref á sviði Gulleggsins.

Í ár tók þátt fjölbreyttur hópur teyma sem spannar allt frá líftækni og sjálfbærri orku yfir í stafrænar lausnir og nýjar leiðir til að nýta gögn, tækni og íslenskar auðlindir og samkeppnin var því mikil.

1. sæti – Affineva

Hugmynd teymisins snýst um að þróa sértækar líftæknilausnir í greiningu og meðhöndlun sjúkdóma.

Hlaut teymið 2.000.000 kr. í verðlaun frá Landsbankanum.

Affineva hlaut einnig Frumukjarnann, líftækniverðlaun Gulleggsins, sem samanstóðu af 300.000 kr. þróunarstyrk, þriggja mánaða þróunar- og prófunartækifæri hjá Frumunni, aðgangi að rannsóknarsetri, handleiðslu sérfræðinga í líftækni og sérsmíðuðum verðlaunagrip frá Héðni. Gróska | Heimar veittu Affineva einnig aðgang að aðstöðu í Grósku, einum öflugasta suðupotti nýsköpunar á Íslandi, sem gerir teyminu kleift að þróa hugmynd sína í nálægð við önnur sprotafyrirtæki og fjárfesta.

2. sæti – IORDEN

Teymið kynnti lausn sem nýtir gervigreind og sjálfvirkni til að einfalda og bæta gæðaeftirlit hjá smærri matvælaframleiðendum.

Hlaut teymið 1.000.000 kr. í verðlaun frá Landsbankanum.

IORDEN hlaut einnig verðlaun Ungra frumkvöðla – Junior Achievement Iceland og fær tækifæri til að taka þátt í GEN-E nýsköpunarkeppninni í Riga í Lettlandi þar sem teymið mætir alþjóðlegum jafningjum og fjárfestum á stærra sviði.

3. sæti – Norrstone

Hugmynd teymisins snýst um stafrænt vistkerfi fyrir skartgripi, lausn sem byggir á stafrænum skartgripavottorðum á bálkakeðju sem auðveldar vottun, tryggingar, vildarkerfi og endursölu.

Hlaut teymið 500.000 kr. í verðlaun frá Landsbankanum.

Aukaverðlaun

KPMG veitti einu teymi aukaverðlaun í form 20 klukkustunda ráðgjafar sem nýtist við áætlunargerð, fjárfestakynningar, stofnun félags, skattamálum og öðrum lykilskrefum í uppbyggingu sprotafyrirtækis. Verðlaunin hlaut teymið E-Lísa.

Vinsælasta teymið í kosningu gesta og áhorfenda, Deadgroove Games, hlaut verðlaun Origo sem felst í ráðgjöf frá sérfræðingum fyrirtækisins, meðal annars í sölu- og markaðsmálum og þróun stafrænnar lausnar.

Heiðursegg Gulleggsins 2026 til Lavashow

Heiðursegg Gulleggsins 2026 var veitt fyrirtækinu Lavashow en hugmyndin á bak við fyrirtækið var meðal þeirra tíu hugmynda sem kepptu um Gulleggið árið 2016. Lavashow hefur á síðustu árum vakið mikla athygli fyrir að umbreyta náttúruöflunum í einstaka upplifun fyrir gesti, byggja upp sterkt vörumerki og skapa verðmæti bæði í ferðaþjónustu og skapandi greinum.

Með heiðursegginu er viðurkennt það mikla frumkvöðlastarf, úthald og hugrekki sem liggur að baki því að byggja upp fyrirtæki eins og Lavashow.