YAY og Lands­bank­inn stofna nýtt fé­lag – Yay­land

Fjártæknifyrirtækið YAY og Landsbankinn hafa stofnað nýtt félag, Yayland ehf., sem mun sérhæfa sig í þróun, sölu, útgáfu og rekstri á stafrænum og hefðbundnum inneignarkortum, gjafabréfum og vildarkortum. Yayland mun taka yfir alla gjafakortastarfsemi YAY á Íslandi og jafnframt alla útgáfu og rekstur á inneignarkortum Landsbankans.

Með stofnun félagsins verður til leiðandi fjártæknifyrirtæki með mikla reynslu, þekkingu og sérhæfingu í inneignarlausnum fyrir fyrirtæki og stofnanir.

YAY hefur á undanförnum árum markað sér sterka stöðu sem eitt fremsta fjártæknifyrirtæki landsins, m.a. með útgáfu Ferðagjafarinnar fyrir íslenska ríkið, rekstri gjafabréfaappsins YAY, og með þjónustu við yfir 250 fyrirtæki og samstarfsaðila. Á sama tíma hefur Landsbankinn haldið úti traustri gjafakortaþjónustu fyrir mörg af stærstu fyrirtækjum landsins í formi inneignarkorta, með sterkum innviðum og áratugareynslu í dreifingu og þjónustu.

Ragnar Árnason, einn af stofnendum YAY og framkvæmdastjóri Yayland, segir: „Við sjáum gríðarleg tækifæri í því að þróa og stýra inneignarkortum fyrir fyrirtæki – hvort sem það eru gjafakort, styrktarkerfi eða umbunarkerfi. Yayland verður leiðandi fjártæknifyrirtæki á Íslandi á þessu sviði og við hlökkum til að þjónusta bæði lítil og stór fyrirtæki og stofnanir með snjöllum, stafrænum lausnum.“

Lilja Björk Einarsdóttir, bankastjóri Landsbankans, segir:
„Við erum spennt fyrir samstarfinu við YAY í gegnum Yayland. Það er mikil þróun í inneignarkortum og spennandi tækifæri til að nýta stafræna dreifingu korta. Með samstarfinu sameinum við krafta okkar í inneignakortum og nýtum sameiginlega styrkleika og reynslu til að bjóða fyrirtækjum sem hafa inneignarkort í sínu vöruframboði aukinn sveigjanleika og fjölbreyttari útfærslur fyrir sína viðskiptavini.“

Úrval lausna sem Yayland mun bjóða verður fjölbreytt, hvort sem fyrirtæki vilja gefa út plastkort, stafræn kort, greiðslukort, nota strikamerki eða QR-kóða eða kaupa gjafabréf fyrir viðskiptavini eða starfsfólk.

Félagið mun mæta þörfum fyrirtækja af öllum stærðum og jafnt þeim sem vilja hefðbundna útfærslu eða nýjustu stafrænu kerfin. Lausnirnar eru skalanlegar, öruggar og byggja á áralangri innsýn í þarfir markaðarins og notenda.

Á myndinni eru frá vinstri: Ari Steinarsson, Lilja Björk Einarsdóttir og Ragnar Árnason.