Holtaskóli bar sigur úr býtum í Skólahreysti 2025
Holtaskóli er sigurvegari Skólahreysti 2025 og ber því titillinn Skólahreystimeistari með rentu! Úrslitin réðust í æsispennandi lokakeppni tólf grunnskóla fyrir troðfullum sal í íþróttamiðstöðinni að Varmá í Mosfellsbæ, laugardagskvöldið 24. maí.
Í sigurliði Holtaskóla voru þau Svanur Bergvins Guðmundsson, Auður Eyfjörð Ingvarsdóttir, Benedikt Árni Hermannsson og Elva Björg Ragnarsson.
Silfurlið Langholtsskóla skipuðu þau Pétur Húnfjörð Davíðsson, Bryndís Óskarsdóttir, Hildur Hekla Einarsdóttir og Karl Sören Theodórsson.
Í bronsliði Flóaskóla voru þau Kristófer Máni Andrason, Magnea Bragadóttir, Karólína Þórbergsdóttir og Freyr Sturluson.
Í keppninni áttu þau mistök sér stað að árangur Flóaskóla í hraðaþraut fór ekki réttur inn í stigatöflu og endaði Flóaskóli því þar í sjötta sæti. Við leiðréttum það hér með: Flóaskóli endaði í þriðja sæti með 50 stig og Varmahlíðarskóli í 4. sæti, aðeins einu stigi á eftir Flóaskóla með 49 stig.
Þrjú Íslandsmet í hreystigreip og eitt í upphífingum
Íslandsmetið í hreystigreip var bætt í fyrra þegar Saga Björgvinsdóttir úr Grunnskólanum á Ísafirði hékk í 20:02 mínútur í undankeppni. Í undankeppninni 2025 sló Dagbjört Lilja Oddsdóttir úr Lágafellsskóla metið með því að hanga 23:02 en Saga hrifsaði metið aftur til sín um þremur klukkustundum síðar með því að hanga í 24:01 mínútu. Grunnskólinn á Ísafirði komst ekki í úrslit og Dagbjört Lilja nýtti keppnina til að ná metinu aftur til sín með því að hanga í 25:01 mínútu.
Íslandsmetið í hreystigreip var þó ekki eina Íslandsmetið sem féll þetta árið því Svanur Bergvins Guðmundsson úr Holtaskóla setti nýtt Íslandsmet í upphífingum í undankeppninni með því að ljúka 69 upphífingum. Hann tók 65 upphífingar í úrslitakeppninni á laugardag og var því ekki langt frá sínum besta árangri. Hann sigraði einnig í dýfum á laugardag með því að taka 63 slíkar. Gamla metið í upphífingum, sem Ari Tómas Hjálmarsson úr Árbæjarskóla setti árið 2020, var 67.
Þökkum fyrir frábæra keppni
Bryndís Óskarsdóttir úr Langholtsskóla tók flestar armbeygjur, eða 52 stykki. Holtaskóli átti besta tímann í hraðaþrautinni þegar Elva Björg Ragnarsdóttir og Benedikt Árni Hermannsson fóru brautina á 2:04 mínútum.
Þess má geta að Íslandsmetið í armbeygjum er 177 armbeygjur. Jóhanna Júlía Júlíusdóttir úr Myllubakkaskóla setti þetta met árið 2012. Íslandsmetið í dýfum er 101 hefur Valgarð Reinhardsson úr Lindaskóla verið handhafi þess frá árinu 2012.
Aðrir skólar sem kepptu í úrslitum í ár voru Grunnskóli Húnaþings vestra, Hraunvallaskóli, Lágafellsskóli, Heiðarskóli, Árbæjarskóli, Réttarholtsskóli, Grunnskólinn í Þorlákshöfn og Lundarskóli.
Gríðarlega góð stemning var á Skólahreysti 2025. Landsbankinn er aðalbakhjarl Skólahreysti og þakkar skipuleggjendum, áhorfendum, keppendum og skólum þeirra fyrir frábæra keppni!
