Sagareg er sigurvegari Gulleggsins 2025
Sigurvegari frumkvöðlakeppninnar Gulleggsins árið 2025 er Sagareg sem gengur út á að einfalda gerð umsóknarskjala um markaðsleyfi lyfja með gervigreind og sérhæfðum hugbúnaði.
Lokakeppni Gulleggsins fór fram föstudaginn 14. febrúar sl. í Grósku þar sem stemningin var rafmögnuð og keppendur heilluðu áhorfendur og dómara upp úr skónum.
Landsbankinn hefur verið einn af aðalstyrktaraðilum keppninnar um langt árabil og afhenti Sara Pálsdóttir, framkvæmdastjóri Samskipta og menningar hjá bankanum verðlaunaféð.
1. sæti: Sagareg
Sagareg sjálfvirknivæðir textaskrif, töflugerð og gæðaeftirlit sem tryggir hraðari og áreiðanlegri umsóknir til heilbrigðisyfirvalda. Í teyminu eru þeir Guðjón Ásmundsson og Ómar Ingi Halldórsson.
Verðlaun fyrir 1. sæti voru 2.000.000 krónur frá Landsbankanum.
Á efstu myndinni: Jenna Björk, Sara Pálsdóttir, Ómar Ingi Halldórsson, Guðjón Ásmundsson, Logi Einarsson, Ásta Sóllilja Guðmundsdóttir, Sigríður Mogensen.
2. sæti: Hvað nú?
Í 2. sæti var Hvað nú? sem veitir syrgjendum heildstæða þjónustu sem einfaldar ferlið í kjölfar andláts ástvina. Þjónustan styður syrgjendur á erfiðum tíma og hjálpar þeim að komast fyrr aftur út í samfélagið. Í teyminu eru þær Erna Niluka Njálsdóttir og Guðrún Heimisdóttir.
Verðlaun fyrir 2. sæti voru 1.000.000 krónur frá Landsbankanum. Þær hlutu einnig sérstök verðlaun frá KPMG: 20 klukkustunda ráðgjöf sem var kynnt af Önnu Guðrúnu Gunnlaugsdóttur.
3. sæti: Samvís
Samvís þróar nýja kynslóð leitarvéla fyrir vísindamenn og námsmenn með gervigreindartækni. Lausnin auðveldar aðgengi að rannsóknum og skapar brú milli vísinda og samfélags. Í teyminu eru þeir Birgir Bragi Gunnþórsson, Einir S. Arinbjarnarson, Haukur Ingi S. Jónsson og Jóhann T. Portal.
Verðlaun fyrir 3. sæti voru 500.000 krónur frá Landsbankanum. Samvís var einnig valið sem háskólateymið sem fer fyrir Íslands hönd til Aþenu á alþjóðlega frumkvöðlakeppni í boði JA Iceland, kynnt af Petru Bragadóttur, framkvæmdastjóra JA Iceland.
Sérstök verðlaun: Planda og pilot bloks
Planda hlaut verðlaun fyrir lausn sem auðveldar vinahópum að finna sameiginlegan tíma til að hittast. Coca-Cola á Íslandi veitti teyminu markaðsráðgjöf frá Atla Sigurði Kristjánssyni, framkvæmdastjóra markaðssviðs félagsins, en verðlaunin kynnti Anna Regína Björnsdóttir, forstjóri Coca-Cola á Íslandi.
Gróska bauð upp á þriggja mánaða aðstöðu í Gróðurhúsinu, veitt af Sigurði Ólafssyni. Þau verðlaun hlaut pilot bloks, sem hefur þróað stýrikerfi fyrir gatnalýsingu sem er einfalt og hagkvæmt í rekstri og byggir á opnum hugbúnaði.
Heiðursverðlaun 2025 – Meniga
Að lokum fékk Meniga heiðursverðlaun Gulleggsins 2025 fyrir framúrskarandi framlag sitt til íslensks frumkvöðlastarfs. Meniga tók þátt í Gullegginu árið 2009 og var þá á meðal topp 10 en hlaut ekki verðlaunasæti. Síðan hefur Meniga náð miklum árangri og fest sig í sessi sem leiðandi fyrirtæki á sínu sviði. Sigríður Mogensen, stjórnarformaður KLAK, veitti viðurkenninguna, og Ásgeir Örn Ásgeirsson, Viggó Ásgeirsson og Georg Lúðvíksson, stofnendur Meniga, tóku við henni og ávörpuðu viðstadda.
