Vel heppn­að­ur fund­ur um leið­ir til að stækka fyr­ir­tæki

Alls eru um 18.000 lítil og meðalstór fyrirtæki og félög í virkum viðskiptum við Landsbankann og undanfarið hefur bankinn lagt sérstaka áherslu á að bæta þjónustu við þennan mikilvæga viðskiptavinahóp, eins og kom fram hjá Lilju B. Einarsdóttur, bankastjóra Landsbankans, þegar hún setti fundinn.

Arnheiður Klausen Gísladóttir, forstöðumaður á Fyrirtækjasviði Landsbankans, fjallaði um þau atriði sem bankinn horfir helst til þegar fyrirtækjaeigendur kynna áform um stækkun og aukin umsvif fyrir bankanum, með það fyrir augum að fá aðstoð við fjármögnun. Hún ræddi m.a. mikilvægi trausts í samskiptum og að rekstraráætlanir væru vel unnar og trúverðugar. Að veita aðstoð við að stækka fyrirtæki væri mjög ánægjulegur hluti af starfinu. „Við í Landsbankanum erum svo heppin að hafa fengið tækifæri til að vinna með mörgum frábærum fyrirtækjum. Í mörgum tilfellum höfum við verið með alveg frá byrjun – alveg frá því að kennitalan fyrir reksturinn var stofnuð og stundum fyrr, því margir byrja með rekstur á eigin kennitölu,“ sagði hún.

Mannauðsmálin mikilvæg

Knútur Rafn Ármann og Helena Hermundardóttir, eigendur Friðheima, hafa náð miklum og eftirtektarverðum árangri, bæði í búskap og í ferðaþjónustu. Á fundinum fór Knútur yfir sögu fyrirtækisins, allt frá stofnun árið 1995 til dagsins í dag. Hann rakti hvernig framleiðsla á tómötum hefði á þessum árum aukist úr 15 tonnum á ári í 700 tonn, gróðurhúsin verið stækkuð úr 800 fermetrum í 11.000 fermetra og veltan aukist úr 1,8 milljónum króna í 1.600 milljónir króna. Árið 2008 hófu þau hjónin að bjóða upp á ferðaþjónustu og síðan hefur gestum fjölgað úr 900 í 250.000! Stækkunin fól í sér ýmsar áskoranir en Knútur sagði að mannauðsmálin hefðu verið sú stærsta. Í upphafi var Helena ein starfandi hjá fyrirtækinu en nú telur starfsfólk 80 manns. Það hafi verið mikil gæfa að þau hefðu frá því fyrirtækið tók að stækka fyrir alvöru unnið faglega að mannauðsmálum. Árangurinn birtist m.a. í ánægðu starfsfólki og að Friðheimar eru mjög eftirsóttur vinnustaður. Friðheimar halda áfram að dafna en Knútur greindi frá því á fundinum að fyrirtækið hefði nýlega samið um kaup á 4.000 fermetra jarðaberjaræktun í nágrenninu sem myndi styrkja fyrirtækið enn frekar og gera reksturinn fjölbreyttari.

Áhersla á traust og vöxt

Húrra Reykjavík hóf rekstur árið 2014 og síðan hefur félagið vaxið og dafnað, líkt og Sindri Jensson, stofnandi og meðeigandi, fór yfir í sínu erindi. Hann og meðeigendur hans reka nú 13 veitingastaði, þrjár ísbúðir, ísgerð, tvær fataverslanir, golfmerki og næturklúbb. Sindri veitti áhugaverða innsýn inn í rekstur fyrirtækisins og fjallaði ítarlega um mikilvægi þess að taka ákvarðanir á grundvelli gagna úr rekstrinum. Þegar hann og Jón Davíð Jónsson stofnuðu Húrra Reykjavík hafi stefnan frá upphafi verið að stefna á heilbrigðan vöxt með áherslu á gæði, klassík og framþróun – að vaxa eða deyja hefði verið þeirra mottó. Hann fjallaði einnig um góðan árangur á samfélagsmiðlum og mikilvægi þess að leggja til samfélagsins, t.d. með viðburðum, listsýningum og að gefa ungu og efnilegu fólki tækifæri. Miklu skipti að byggja upp traust gagnvart viðskiptavinum, birgjum og öðrum. Líkt og Friðheimar hyggja Sindri og félagar á frekari vöxt en stefnt er að því að opna nýjan bar, Nínu, á Hverfisgötunni innan skamms.

Úr 18 fermetra bílskúr í vinsæla útivistarbúð

Þeir Leifur Dam Leifsson og Tómas Jón Sigmundsson hófu saman rekstur árið 2004 í 18 fermetra bílskúr í Hvassaleitishverfi í Reykjavík. Þar gerðu þeir við gúmmíbáta og galla – þaðan kemur nafn fyrirtækisins, GG Sport. „Á síðastliðnum tíu árum höfum við náð að byggja upp eina vinsælustu útvistarbúð landsins. Ég get sagt ykkur strax að það var ekki auðvelt og ég held að við höfum rekið okkur á allt sem hægt var að reka sig á,“ sagði Leifur í sínu erindi. Tilgangurinn með rekstrinum hefði ekki verið að græða peninga heldur að stofna og reka fyrirtæki sem þeir væru stoltir af. Leifur sagði að stækkun á fyrirtæki væri einfaldlega að auka veltuna og leysa öll vandamál í kringum það. „Við höfum haft að leiðarljósi að stækka húsnæði ekki fyrr en allt var er orðið sprungið, þ.e. það þarf allt að vera sprungið í ákveðinn tíma til að réttlæta næsta skref. Kannski má segja að stækkun þarf til að koma á móts við óhagstætt ástand og í stækkuninni á að felast hagræðing og aukin tækifæri,“ sagði Leifur. Þeir hefðu forðast óskhyggju en gert ráð fyrir og vonað það besta. Um leið þyrfti reksturinn alltaf að vera öruggur þrátt fyrir hugsanlegt bakslag. Þótt fyrirtækið hefði vissulega tekið bankalán til að eiga fyrir stækkun, hefði áhersla þeirra á góðan rekstur skilað sér í því að nú væri fyrirtækið skuldlaust og þar með tilbúið til að taka frekari skref til stækkunar.

Að fundi loknum fengu þau Arnheiður, Knútur, Sindri og Leifur spurningar úr sal og sköpuðust áhugaverðar umræður. Við í Landsbankanum þökkum þeim fyrir áhugaverð erindi og gestum kærlega fyrir komuna.