Viðburðir HönnunarMars í Landsbankanum
Landsbankinn er stoltur styrktaraðili HönnunarMars og tekur þátt í hátíðinni með ýmsum hætti. Við stöndum fyrir viðburðum í bankanum í Reykjastræti og í aðdraganda hátíðarinnar heimsóttum við sjö hönnuði til að fá innsýn í verkefnin sem þau eru að vinna að.
Myndbönd af heimsóknum okkar til hönnuðanna munu birtast eitt af öðru á Youtube-rás bankans næstu daga. Það er gífurleg gróska og mikið um að vera í hönnunarsamfélaginu á Íslandi en Hönnunarmars er eitt helsta kynningarverkefni íslenskrar hönnunar og arkitektúrs.
Hér má sjá tvö af þeim myndböndum:
Fatahönnuðir framtíðarinnar (Young talents of Fashion Design)
Vel valdar flíkur frá hönnuðum verða til sýnis í Landsbankanum við Reykjastræti 6, þar sem gestum gefst tækifæri til að sjá og njóta handverks þeirra ásamt því að fá innsýn í vinnu þeirra og hvert fatahönnuðir framtíðarinnar stefna.
Þátttakendur:
- Arason
- Atli Geir Alfreðsson
- Ása Bríet Brattaberg
- Bosk
- Karitas Spano
- Tekla Sól
- Thora Stefansdottir
Sýningin verður opin gestum og gangandi á almennum afgreiðslutíma bankans dagana 24. - 28. apríl.
Sýningin lifnar við
Sýningin Fatahönnuðir framtíðarinnar lifnar við á laugardaginn í gjörningi og sýningu með fyrirsætum ásamt tónlistaratriði frá Gabríel Ólafs.
Um er að ræða samtal tísku, arkitektúrs, tónlistar og viðskipta í viðburði þar sem framúrstefnulegum hugmyndum og fatahönnun er fagnað.
Listrænn stjórnandi og framleiðandi: Anna Clausen.
Tímasetning: Laugardagurinn 27. apríl frá kl. 17:00 til 19:00.
Fjárfestum í hönnun
- örerindi og pallborðsumræður um fjármagn
Hér sköpum við vettvang til að fjalla um tækifærin sem felast í að fjárfesta í hönnun og mikilvægi þess.
Hvers vegna á að fjárfesta í hönnun og hvaða leiðir hafa hönnuðir til að sækja sér fjármagn?
Reynslumiklir einstaklingar úr heimi hönnunar og fjárfestinga deila sinni sýn, svara spurningum og taka þátt í umræðu um þetta mikilvæga viðfangsefni.
Meðal þeirra sem koma fram eru:
- Erik Rimmer, BO BEDRE, aðalritstjóri
- Martta Louekari, JUNI, samskiptastjóri
- Ragna Sara Jónsdóttir, FÓLK, stofnandi og listrænn stjórnandi
- Sigga Heimis, hönnunarstjóri
- Heiðdís Inga Hilmarsdóttir, Krónan, verkefnastjóri sjálfbærnimála
Tímasetning: Föstudagurinn 26. apríl frá kl. 16.30-18:00.
Umræðurnar fara fram á ensku í Landsbankanum við Reykjastræti 6.
Sætaframboð er takmarkað og skráning nauðsynleg.
Viðburður á Facebook
Tryggðu þér sæti
Aðrar sýningar í Reykjastræti 6
Að auki verða sex sýningar í ónotuðu verslunarrými í Reykjastræti 6, sem Landsbankinn leggur til. Sýningarnar verða opnar frá miðvikudeginum 24. apríl til sunnudagsins 28. apríl.
Hæ/Hi: Designing Friendship hópurinn, sem er samvinnuverkefni hönnuða og hönnunarteyma frá Íslandi og Seattle, tekur fyrir hluti og athafnir sem tengjast heimkomu og brottför, móttöku og kveðjustund á þriðju sýningu sinni, Hæ/Hi: Vol III | Welcome.
Þátttakendur voru spurðir hvernig hægt væri að bæta upplifunina við að koma inn á eða fara út af heimili þannig að það vekti með heimilisfólki og gestum notalegheit og ró og væri gert með vináttu og gestrisni að leiðarljósi.
Sýningin Merkileg er haldin í tengslum við vinnslu á bókinni Merki Íslands sem mun innihalda samansafn merkja sem hönnuð hafa verið á Íslandi. Við gerð bókarinnar kom fljótt í ljós að varðveisla og skráning á nöfnum hönnuða merkjanna var mjög ábótavant og eru því mörg merkin svo að segja munaðarlaus.
Á sýningunni verður því bæði reynt að varpa ljósi á mikilvægi og fjölbreytt hlutverk merkja en einnig verður leitast við að hafa uppi á hönnuðum munaðarlausu merkjanna og óskað eftir ábendingum almennings.
Þín skapandi gervigreind. Í verkinu eru styrkleikar og veikleikar gervigreindar í sköpunarferlinu rannsakaðir. Hvernig parast tæknin við mannlega eiginleika eins og upplifun á fegurð, virði og skilningi á fjölbreytilegu samhengi?
Innsýni fagnar upprennandi íslenskum fatahönnuðum með sýningaropnun á HönnunarMars þriðja árið í röð.
Hjá Innsýni er stuðningur við unga fatahönnuði hafður að leiðarljósi líkt og fyrri árin. Sýningin skapar vettvang sem gefur þessum upprennandi hönnuðum pláss til að koma sínum nýjustu fatalínum á framfæri til almennings og fréttamiðla.
Snúningur. Einkennisfatnaður Icelandair hefur flogið út um allan heim. Hann hefur þjónað hlutverk sínu í fjölda ára og boðið milljónir farþega velkomna um borð. Nú er upprunalegu hlutverki fatnaðarins lokið en við ætlum að taka snúning á honum og finna leið til að halda ferðalaginu áfram.
Í verkefninu nýta vöruhönnuðirnir Birta Rós Brynjólfsdóttir og Hrefna Sigurðardóttir hjá Stúdíó Fléttu ríkan heim efniviðar úr eldri fatnaðinum, allt frá hnöppum og höttum, pífum og sylgjum til klúta og kraga. Þær taka skapandi snúning á spurningunni – getur einkennisfatnaður orðið að tösku?
Fley er samsýning upprennandi hönnuða sem haldin verður í fyrsta skiptið á HönnunarMars í ár. Verk sýningarinnar hafa verið valin úr umsóknum sem sendar voru inn í opið kall en Félag vöru- og iðnhönnuða stendur fyrir sýningunni. Þema sýningarinnar er upprennandi hönnuðir og stóð því opna kallið til boða fyrir hönnuði sem útskrifuðust úr hönnunarnámi árið 2020 eða síðar.
