Opnum sandkassa til að undirbúa nýjar lausnir
Ný lög um greiðsluþjónustu hafa tekið gildi. Af því tilefni höfum við opnað sandkassa sem fjártæknifyrirtæki og önnur fyrirtæki í þessum geira geta nýtt til að þróa fjártæknilausnir til að tengja við kerfi bankans.
Nýju lögin byggja á Evróputilskipun sem gengur undir heitinu PSD2. Lögin tóku gildi 1. nóvember 2021. Þegar reglugerð sem fylgir lögunum kemur að fullu til framkvæmda þann 1. maí 2022 munu fleiri aðilar en aðeins bankar geta boðið einstaklingum og fyrirtækjum upp á helstu greiðsluaðgerðir og yfirlit bankareikninga. Þetta er þjónusta sem hérlendis hefur aðeins verið veitt í netbönkum og bankaöppum, en frá 1. maí 2022 geta viðskiptavinir Landsbankans sem það kjósa væntanlega séð bankareikninga sína í öppum og vefsvæðum utan bankans og millifært af reikningum sínum þar.
Allt mun þetta byggja á að viðskiptavinir vilji nýta sér þessa þjónustu og samþykki sérstaklega að fjártæknifyrirtæki og önnur fyrirtæki fái aðgang að gögnum þeirra hjá Landsbankanum. Aðgengið nær til svonefndra greiðslureikninga en það eru m.a. óbundnir bankareikningar sem eru t.d. notaðir fyrir greiðslur, millifærslur og úttektir með greiðslukortum.
Sýndaraðgangur til að undirbúa lausnir
Til þess að auka möguleikana á að slíkar lausnir verði tilbúnar í vor höfum við, í samræmi við ákvæði laganna, opnað sandkassa (e. sandbox), sem einnig mætti kalla þróunargátt. Í sandkassanum eru engin raunveruleg gögn um viðskiptavini en þar er á hinn bóginn búið að stilla upp sýndaraðgangi að tilteknum kerfum bankans. Þar geta fjártæknifyrirtæki og önnur fyrirtæki eða aðilar í þessum geira kynnt sér hvernig ýmsar aðgerðir bankans virka. Í sandkassanum er líka hægt að prófa að sækja reikningsupplýsingar og færsluyfirlit, prófa innlendar og erlendar millifærslur og margt fleira. Með aðgangi að þessum gögnum er hægt að forrita lausnir sem „tala við“ kerfi bankans.
Prófunarumhverfið er hýst og rekið af kanadíska tæknifyrirtækinu Salt Edge, samstarfsaðila Landsbankans í PSD2-lausnum. Salt Edge er leiðandi á heimsvísu í þróun skilflata fyrir bæði banka og fjártæknifyrirtæki og framleiðir íhluti fyrir fjölbreyttar þarfir fjármálamarkaðar víða um heim. Samstarf við svo stóran og traustan aðila opnar á mikla möguleika fyrir viðskiptavini Landsbankans, þar sem alþjóðleg þekking fjölda sérfræðinga nýtist bankanum við að veita öfluga og lipra þjónustu.
Uppfylla þarf strangar kröfur til að veita þjónustuna
Tilgangur laganna er að auka samkeppni og neytendavernd á fjármálamarkaði, sem og að stuðla að vöruþróun og nýsköpun á greiðslumarkaði. Aðeins leyfisskyldir aðilar innan Evrópska efnahagssvæðisins (ESB og EFTA) geta veitt nýju greiðsluþjónustuna, t.d. fjártæknifyrirtæki. Aðilarnir þurfa sérstakt starfsleyfi eða samþykkta skráningu frá fjármálaeftirliti síns lands og verða að uppfylla ítarlegar kröfur sem settar eru fram í nýju lögunum. Til að gæta jafnræðis innan Evrópu eru aðgerðir og skýringartextar á ensku. Engar aðgangstakmarkanir eru á þróunargáttinni sem er virkilega einföld og auðveld í notkun.
Þú finnur hlekk á prófunarumhverfið á vefslóðinni developers.landsbankinn.is.
Við hlökkum til að sjá þig í sandkassanum!
