Landsbankinn styrkir fimmtán framúrskarandi námsmenn
Þetta er í þrítugasta og annað skipti sem bankinn veitir efnilegum nemendum styrki af þessum toga. Samfélagssjóður Landsbankans gegnir lykilhlutverki í stuðningi bankans við samfélagið. Stuðningur úr Samfélagssjóði kemur til viðbótar við fjölbreytt samstarfsverkefni bankans á sviði mannúðarmála, menningar, menntunar, nýsköpunar og íþrótta um land allt.
Veittir eru styrkir í fimm flokkum: til framhaldsskólanema, iðn- og verknema, háskólanema, til háskólanema í framhaldsnámi og listnema.
Styrkir til framhaldsskólanáms – 200.000 kr. hver
Hildur Agla Ottadóttir
Hildur er nemandi við Menntaskólann í Reykjavík. Henni hefur gengið vel í námi og hún hefur lokið lokaprófum með ágætiseinkunn. Hildur hefur látið að sér kveða í félagsstörfum, hún hefur lokið sjö stigum í klassískum listdansi frá Listdansskóla Íslands og æfir einnig kickbox.
Karl Ísak Birgisson
Karl stundar nám við Menntaskólann í Reykjavík. Hann var að ljúka sínu öðru ári í skólanum og hefur námsárangur verið til fyrirmyndar. Karl er einnig liðtækur í körfubolta og er leikmaður meistaraflokks Fjölnis og U18 landsliðsins.
Tómas Pálmar Tómasson
Tómas er nemandi við Verzlunarskóla Íslands og hefur námsárangur verið framúrskarandi. Tómas er einnig einn af efnilegustu karatemönnum landsins og hefur unnið til fjölda verðlauna á alþjóðavettvangi.
Styrkir til iðn- og verknáms - 400.000 kr. hver
Aníta Þula Cummings Benediktsdóttir
Aníta stundar nám við Borgarholtsskóla við rennismíði og vélvirkjun. Henni hefur gengið mjög vel í námi og er með yfir 9 í meðaleinkunn. Hún er virk í félagsstörfum og hefur meðal annars tekið þátt í ráðgjafarvinnu við að gera nám aðgengilegra fyrir fólk og ungmenni með sérþarfir af einhverju tagi.
Davíð Phuong Xuan Nguyen
Davíð fær styrk til að stunda nám í margmiðlunarhönnun við Copenhagen School of Design and Technology. Davíð hefur sýnt að hann er góður námsmaður en hann útskrifaðist frá Háskóla Íslands með ágætiseinkunn í hugbúnaðarverkfræði eftir að hafa lokið stúdentsprófi með góðum árangri af eðlisfræðibraut Menntaskólans í Reykjavík. Hann keppir í badminton fyrir Badmintonfélag Hafnarfjarðar og var unglingalandsliðsmaður í greininni um tíma.
Halla Sif Svansdóttir
Halla nemur ylrækt við Landbúnaðarháskóla Íslands þar sem henni hefur vegnað ákaflega vel. Halla er með BA-gráðu í heimspeki eftir að hafa orðið stúdent frá Menntaskólanum við Hamrahlíð þar sem hún var virk í félagsstarfi og meðal annars forseti nemendafélagsins.
Styrkir til grunnnáms við háskóla - 400.000 kr. hver
Hallþór Jökull Hákonarson
Hallþór er nemandi við Landbúnaðarháskóla Íslands þar sem hann er í BS-námi í skógrækt. Hallþóri hefur gengið vel í námi og hefur tekið virkan þátt í félagsstörfum. Má til dæmis nefna að hann hefur verið varaformaður Ungviðar, ungliðahreyfingu Skógræktarfélags Íslands. Hallþór hefur landvarðarréttindi frá Umhverfisstofnun og er reyndur leiðsögumaður.
Iveta Chavdarova Ivanova
Iveta er nemandi í gagnvirkri hönnun við Álaborgarháskóla í Danmörku og hefur lokið fyrsta ári af þremur. Hún hefur sýnt að hún er afburða námskona en hún útskrifaðist úr Menntaskólanum í Reykjavík með ágætiseinkunn og var semidúx málabrautar. Iveta er einnig afrekskona í íþróttum en hún hefur æft og keppt í karate í mörg ár og æfir nú karate undir handleiðslu landsliðsþjálfara Dana.
Máni Þór Magnason
Máni er nemandi við Háskóla Íslands þar sem hann leggur stund á nám í matvælafræði. Hann lauk stúdentsprófi frá Verslunarskóla Íslands þar sem honum gekk vel í námi og var um leið mjög virkur í félagsstörfum. Á næsta ár mun Máni fara til Hollands og vera skiptinemi við Wageningen University.
Styrkir til framhaldsnáms á háskólastigi – 500.000 kr. hver
Bergþór Traustason
Bergþór útskrifaðist úr verkfræðilegri eðlisfræði árið 2018 með ágætiseinkunn. Ári seinna útskrifaðist hann með láði með meistaragráðu úr líftækni frá Cambridgeháskóla. Á námsferli sínum hefur Bergþór verið tilnefndur til og unnið til fjölda verðlauna. Hann var meðal annars valinn sem einn af „100 leiðtogum morgundagsins“ (e. 100 leaders of tomorrow) á alþjóðlegu sviði líftækninnar. Bergþór er doktorsnemi í þverfaglegum lífvísindum við Oxfordháskóla. Áherslur hans og áhugasvið liggja helst í notkun líftækni til að þróa og framleiða fjölbreyttar vörur og lífsnauðsynleg aðföng á skilvirkan og umhverfisvænan hátt.
Elísabet Herdísar Brynjarsdóttir
Elísabet lauk námi í hjúkrunarfærði frá Háskóla Íslands árið 2017 með góðum árangri. Meðfram námi var hún mjög virk í félagsstörfum. Gegndi hún meðal annars formennsku í Stúdentaráði Háskóla Íslands og kom að stofnun geðfræðslufélagsins Hugrúnu. Að námi loknu tók Elísabet við starfi hjá Rauða krossinum þar sem hún hefur komið að uppbygginu og verið ötul talskona skaðaminnkunarverkefnisins Frú Ragnheiður og barist fyrir auknum réttindum heimilslausra.
Framundan hjá Elísabetu er meistaranám við University of British Columbia í Vancouver, í námi er kallast Master of Health Leadership and Policy.
Inga Guðrún Eiríksdóttir
Inga Guðrún útskrifaðist með ágætiseinkunn af eðlisfræðibraut 1 frá Menntaskólanum í Reykjavík árið 2017 og lauk svo BSc-prófi frá Háskóla Íslands vorið 2020 – aftur með ágætiseinkunn. Samhliða námi hefur Inga stundað fjölbreyttar íþróttir en einnig spilar hún á hljóðfæri og hefur lokið 6. stigi í klarinettleik. Inga er á leiðinni til Kaliforníu þar sem hún hefur hlotið inngöngu í doktorsnám við University of California, Santa Barbara (UCSB), þar sem hún mun leggja stund á tölfræði og líkindafræði.
Styrkir til listnáms – 500.000 kr. hver
Harpa Ósk Björnsdóttir
Harpa Ósk útskrifaðist úr Söngskólanum í Reykjavík með fullt hús stiga árið 2018. Hún var einn af sigurvegurum keppninnar Ungir einleikarar 2019 og sama ár bar hún einnig sigur úr býtum í söngkepninni Vox Domini og hlaut nafnbótina „rödd ársins“ í sömu keppni. Harpa hefur einnig lokið BSc-gráðu í rafmagnsverkfræði frá Háskóla Íslands og verið virk í félagsstörfum. Harpa er nú í söngnámi við Hochschule für Musik und Theater „Felix Mendelssohn Bartholdy“ í Leipzig í Þýskalandi.
Kristín Helga Ríkharðsdóttir
Kristín Helga lauk BA-gráðu frá myndlistardeild Listaháskóla Íslands árið 2016. Hún hefur verið virk í sýningarhaldi bæði á Íslandi og erlendis og unnið með ýmiskonar miðla til dæmis myndbönd, skúlptúra og ljósmyndir. Myndbandsverk hennar hafa hlotið verðlaun á kvikmyndahátíðum sem og tónlistarmyndbönd hennar. Kristín Helga hefur verið virk í félagsstarfi myndlistarmanna, meðal annars með setu í varastjórn Nýlistasafnsins og svo er hún hluti af Kling og Bang listahópnum. Hún stundar nú MFA-nám við myndlistardeild New York University Steinhardt.
Valdís Steinarsdóttir
Valdís útskrifaðist með BA-gráðu frá Listaháskóla Íslands árið 2017. Hún hefur nú þegar töluvert látið að sér kveða sem hönnuður en í hönnun sinni hefur Valdís lagt áherslu á efnarannsóknir með það að markmiði að finna vistvænar lausnir á vandamálum samtímans, vekja fólk til umhugsunar og stuðla að jákvæðum samfélagslegum breytingum. Valdís hefur hlotið fjölda viðurkenninga, meðal annars Nordic Designer of the Year hjá Formex Nova árið 2020 og hún var tilnefnd til Emerging Designer of the Year hjá Dezeen Awards sama ár. Framundan hjá Valdísi er meistaranám í Social Design við Design Academy Eindhoven í Hollandi.
Fagfólk í dómnefnd
Landsbankinn leggur áherslu á að fagfólk utan bankans sitji í dómnefndum vegna styrkja úr Samfélagssjóði. Í dómnefnd námsstyrkja í ár sátu: Runólfur Smári Steinþórsson, formaður dómnefndarinnar og prófessor við Háskóla Íslands, Baldur G. Jónsson, mannauðsstjóri Landsbankans, Guðrún Norðfjörð, markaðsstjóri Forlagsins og Jakobína H. Árnadóttir, mannauðsstjóri Hrafnistu.
Myndir frá afhendingu styrkjanna
Á myndinni hér að ofan má sjá styrkþega eða fulltrúa þeirra sem tóku við styrkjunum ásamt Runólfi Smára Steinþórssyni, formanni dómnefndar og Lilju Björk Einarsdóttur, bankastjóra Landsbankans.
