Opið söluferli á eignarhlut Landsbankans í Stoðum
Í lok júní 2020 námu heildareignir Stoða um 25 ma.kr. og eigið fé einnig um 25 ma.kr. en félagið er óskuldsett.
Söluferlið fer fram í samræmi við stefnu Landsbankans um sölu eigna og er öllum opið sem uppfylla skilyrði um að teljast hæfir fjárfestar.
Áhugasamir fjárfestar geta haft samband við Fyrirtækjaráðgjöf Landsbankans með því að senda tölvupóst á netfangið soluferli@landsbankinn.is. Þá má nálgast trúnaðaryfirlýsingu, eyðublað vegna hæfismats og útboðsskilmála hér að neðan.
Fjárfestar sem undirritað hafa trúnaðaryfirlýsingu og uppfylla hæfisskilyrði fyrir þátttöku í söluferlinu fá afhent kynningargögn um Stoðir hf. og gera tilboð á grundvelli þeirra. Eingöngu verður tekið við tilboðum á sérstöku tilboðsformi og samkvæmt þeim skilmálum sem þar koma fram. Tilboðsformið má nálgast hjá umsjónaraðila söluferlisins, Fyrirtækjaráðgjöf Landsbankans.
Landsbankinn áskilur sér rétt til að samþykkja einstök eða öll tilboð sem berast og jafnframt að hafna einstökum eða öllum tilboðum. Gildir það um tilboðin í heild eða að hluta og án tillits til þess verðs sem boðið er. Afstaða til tilboðanna þarf ekki að byggja á sérstökum rökstuðningi og ber Landsbankanum ekki að veita upplýsingar þar að lútandi.
Landsbankinn áskilur sér rétt til þess að breyta, hætta við, framlengja eða fresta söluferlinu hvenær sem er án sérstaks rökstuðnings.
Landsbankinn hefur greint hugsanlega hagsmunaárekstra við söluna og gert ráðstafanir til að takmarka þá. Landsbankinn er eigandi þeirra hluta í Stoðum sem boðnir eru til sölu og umsjónaraðili sölunnar er Fyrirtækjaráðgjöf Landsbankans. Fjárfestum er því bent á að afla sér óháðrar ráðgjafar. Samkvæmt árshlutauppgjöri Stoða , dags. 30. júní 2020, er félagið ekki með vaxtaberandi skuldir og er Landsbankinn því eðli máls samkvæmt ekki lánveitandi félagsins. Landsbankinn er ekki með viðskiptavakt á Arion banka hf., TM hf. eða Símanum hf. Landsbankinn hefur ekki upplýsingar um félagið umfram það sem hluthafar hafa aðgang að en kann að hafa upplýsingar um félagið sem koma ekki fram í sölugögnum í söluferlinu á hlutum í Stoðum.
Í útboðsskilmálum söluferlisins (sjá tengd skjöl hér að neðan) er gerð nánari grein fyrir söluferlinu og fyrirkomulagi sölunnar.
Tilboðsfrestur er til kl. 17.00, þriðjudaginn 8. desember 2020.
Tengd skjöl
