Lindaskóli varði titilinn í Skólahreysti
Lindaskóli í Kópavogi sigraði Skólahreysti 2020 og vann þar með keppnina annað árið í röð. Úrslitakeppnin fór fram í Laugardalshöll laugardaginn 30. maí og var æsispennandi allt til enda.
Lindaskóli lauk keppni með 43 stig. Heiðarskóli sem var í þriðja sæti í fyrra var í öðru sæti í ár með 37 stig og fékk silfrið. Árbæjarskóli hreppti þriðja sætið með 33 stig og fékk bronsið.
Íslandsmet Hjálmars Óla Jóhannessonar úr Egilsstaðaskóla frá 2016, 61 upphífing, var slegið af Ara Tómasi Hjálmarssyni úr Árbæjarskóla sem gerði 67 upphífingar.
Selma Bjarkadóttir úr Lindaskóla gerði flestar ambeygjur, 54 talsins. Systir Selmu, Sara Bjarkadóttir, keppti í hraðaþraut ásamt Lúkasi Magna Magnasyni og fóru þau brautina fyrir Lindaskóla á besta tíma kvöldsins, 2:07 mínútum. Erlín Katla Hansdóttir, Flóaskóla, hékk lengst í hreystigreipinni eða í 8:52 mínútur. Goði Gnýr Guðjónsson úr Grunnskólanum Hellu bar sigur úr býtum í dýfum en hann tók samtals 59 dýfur.
Sigurlið Lindaskóla skipa Lúkas Magni Magnason og Sara Bjarkadóttir (hraðaþraut), Alexander Broddi Sigvaldason (upphífingar og dýfur) og Selma Bjarkadóttir (armbeygjur og hreystigreip).
Silfurlið Heiðarskóla skipa Klara Lind Þórarinsdóttir og Stefán Jón Friðriksson (hraðaþraut), Logi Þór Ágústsson (upphífingar og dýfur) og Emma Jónsdóttir (armbeygjur og hreystigreip).
Bronslið Árbæjarskóla skipa Bjarni Leifs Kjartansson og Hera Christensen (hraðaþraut), Ari Tómas Hjálmarsson (upphífingar og dýfur) og Agnes Birta Eiðsdóttir (armbeygjur og hreystigreip).
Aðrir skólar er kepptu í úrslitum í ár voru Lundarskóli, Flóaskóli, Varmahlíðarskóli, Grunnskólinn Hellu og Grunnskóli Húnaþings vestra.
Landsbankinn óskar öllum keppendum í Skólahreysti og skólum þeirra til hamingju með frábæran árangur í vetur.
