Opnað fyrir umsóknir um útgreiðslu séreignarsparnaðar
Opnað hefur verið fyrir umsóknir um tímabundna útgreiðslu séreignarsparnaðar. Ef sótt er um með rafrænum skilríkjum þarf umsóknin að berast í síðasta lagi 28. apríl til að hægt sé að greiða út fyrstu greiðslu þann 30. apríl. Annars þarf umsókn að berast með tölvupósti í síðasta lagi 25. apríl.
Hægt að sækja um með rafrænum skilríkjum
Hægt er að sækja um tímabundna útgreiðslu á séreignarsparnaði með rafrænum skilríkjum á sjóðsfélagavefnum. Til að hægt sé að greiða út fyrstu greiðslu 30. apríl þarf umsókn með rafrænum skilríkjum að berast í síðasta lagi 28. apríl nk.
Hægt að sækja um með tölvupósti
Þeir sem ekki eru með rafræn skilríki geta sent póst á netfangið vl@landsbankinn.is og óskað eftir því að fá sent umsóknarform. Þegar formið hefur verið fyllt út og undirritað skal skanna það (eða taka mynd af undirrituðu skjali með símanum) og senda aftur á sama netfang. Umsókn með tölvupósti þarf að hafa borist í síðasta lagi 25. apríl til að hægt sé að greiða fyrstu greiðslu 30. apríl.
Um úttekt séreignarsparnaðar
Séreignarsparnaður (viðbótarlífeyrissparnaður) er alla jafna ekki laus til útgreiðslu fyrr en 60 ára aldri er náð. Vegna Covid-19 hafa stjórnvöld veitt heimild fyrir tímabundinni útgreiðslu. Þetta úrræði getur hentað vel fyrir þá sem missa tekjur, sérstaklega ef annar sparnaður er ekki fyrir hendi. Á hinn bóginn þarf að hafa í huga að við úttektina minnkar inneignin sem verður til taks þegar fólk nær lífeyrisaldri en þá lækka tekjur almennt töluvert.
- Hægt er að taka út að hámarki 12 milljónir króna.
- Hægt er að taka að hámarki 800.000 krónur á mánuði.
- Engar sérstakar takmarkanir eru á ráðstöfun fjármunanna.
- Úttektin er tekjuskattsskyld.
