Vísitala íbúðaverðs hækkar örlítið og kaupsamningum fjölgar
Vísitalan hækkaði um 0,1% á milli mánaða í nóvember. Mánuðinn á undan hækkaði hún um 0,9% og um 1,4% í september. Sérbýlishluti vísitölunnar lækkaði um 0,8% og fjölbýlishlutinn hækkaði um 0,4%.
Nafnverð 3,4% hærra en á sama tíma í fyrra
Árshækkun vísitölunnar er enn að færast í aukana og í nóvember hækkaði hún úr 2,9% í 3,4%. Hún hefur hækkað síðustu mánuði eftir að hafa náð lágmarki í 0,8% í júlí.
Dregur úr raunverðslækkunum
Raunverð íbúða á höfuðborgarsvæðinu hefur lækkað milli ára síðustu sjö mánuði. Raunverð fæst með því að taka tillit til verðbólgu, en til þess notum við vísitölu neysluverðs án húsnæðis. Raunverð lækkar þannig milli ára ef árshækkun íbúðaverðs er minni en árshækkun vísitölu neysluverðs án húsnæðis. Ársbreyting raunverðs er enn neikvæð en þó hefur dregið úr lækkuninni síðustu mánuði. Raunverðið er nú 3,6% lægra en á sama tíma í fyrra en í júlí var það 5,9% lægra en í júlí í fyrra.
Kaupsamningum fjölgar aftur milli ára
Undirrituðum kaupsamningum hefur tekið að fjölga á ný þegar fjöldinn er borinn saman við sama tíma í fyrra. Eftir að hafa fækkað milli ára samfellt frá miðju ári 2021 fjölgaði kaupsamningum um 12% milli ára í september og um 21% milli ára í október.
Erfitt er að segja til um þróun íbúðaverðs næstu mánuði. Þrátt fyrir vaxtastigið er nokkur kraftur í eftirspurninni og ekki farið að bera á viðvarandi nafnverðslækkunum. Líkt og við höfum fjallað um í nýlegum hagsjám hefur fyrstu kaupendum fjölgað á ný og hlutfall þeirra af öllum kaupendum hækkað. Það hlýtur að skýrast að hluta til af fjölgun hlutdeildarlána en einnig af umræðu um íbúðaskort og ónóga uppbyggingu íbúðarhúsnæðis. Þá er ekki óhugsandi að óbreytt stýrivaxtastig í vetur og kaupmáttaraukning hafi áhrif á markaðinn.
Fyrirvari
Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara. Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti. Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
