Brottfarir erlendra ferðamanna voru um 131 þúsund í janúar og því aðeins fleiri en í sama mánuði árið áður þegar 121 þúsund ferðamenn komu. Fjórði ársfjórðungur síðasta árs var fjölmennasti fjórði ársfjórðungur frá upphafi þótt árið í heild hafi ekki verið jafnstórt ferðamannaár og metárið 2018. Fjöldinn missti aðeins dampinn í janúar og sennilega hafa jarðhræringarnar á Reykjanesskaga spilað inn í.
Erlend kortavelta dregst einnig saman milli ára
Þó ferðamönnum hafi fjölgað um 8% milli ára í janúarmánuði dróst erlend kortavelta á föstu gengi saman um 3,8%. Kortavelta á hvern ferðamann var því töluvert minni í janúar nú en fyrir ári og dróst saman um 11% milli ára á föstu gengi. Í desember síðastliðnum mátti sjá sömu þróun, en þá fjölgaði ferðamönnum um rúmlega 19% á sama tíma og kortavelta á föstu gengi dróst saman um 8,6%.
Gistinóttum á hvern ferðamann fækkaði í desember
Skráðar gistinætur erlendra ferðamanna hafa aldrei verið jafn margar og í fyrra. Gistinóttum fjölgaði milli ára alla mánuði ársins, að desember undanskildum, þegar þeim fækkaði um 1% milli ára, þrátt fyrir að ferðamenn í desember hafi verið 20% fleiri en árið áður. Þessar tölur ríma því við tölur um erlenda kortaveltu.
Jarðhræringarnar á Reykjanesskaga virðast hafa haldið lítillega aftur af komu ferðamanna. Hins vegar er ólíklegt að þær hafi haft áhrif á breytta neysluhegðun. Kortaveltutölur síðustu tveggja mánaða og gögn yfir gistinætur í desember benda til þess að ferðamenn dvelji skemur og eyði því minna en mánuðina á undan.
Fyrirvari
Innihald og form þessarar greiningar er unnið af starfsfólki Hagfræðideildar Landsbankans hf. (hagfraedideild@landsbankinn.is) og byggist á aðgengilegum opinberum upplýsingum á þeim tíma sem greiningin var unnin. Mat á þeim upplýsingum endurspeglar skoðanir starfsfólks Hagfræðideildar Landsbankans á þeim degi þegar greiningin er dagsett, en þær geta breyst án fyrirvara. Landsbankinn hf. og starfsfólk hans taka ekki ábyrgð á viðskiptum sem byggð eru á þeim upplýsingum og skoðunum sem hér eru settar fram, enda eru þær ekki veittar sem persónuleg ráðgjöf fyrir einstök viðskipti. Bent skal á að Landsbankinn hf. getur á hverjum tíma haft beinna eða óbeinna hagsmuna að gæta, ýmist sjálfur, dótturfélög hans eða fyrir hönd viðskiptavina, s.s. sem fjárfestir, lánardrottinn eða þjónustuaðili. Greiningar eru engu að síður unnar sjálfstætt af Hagfræðideild Landsbankans og innan Landsbankans eru í gildi reglur um aðskilnað starfssviða sem eru aðgengilegar á vef bankans.
