Íslenski lífeyrissjóðurinn hefur nú birt upplýsingar um hvernig sjálfbærnimálum er háttað hjá þeim fyrirtækjum og sjóðum sem lífeyrissjóðurinn fjárfestir í. Einnig birtir sjóðurinn upplýsingar um hversu mikil losun gróðurhúsalofttegunda á sér stað vegna innlends fjárfestingasafns sjóðsins. Þetta mun vera í fyrsta skipti sem íslenskur lífeyrissjóður birtir svo nákvæmar upplýsingar um sjálfbærnimál vegna fjárfestinga sinna.
Ný sjálfbærnistefna
Unnið er að frekari greiningu á erlendu eignasafni sjóðsins en um 30% af safninu er í sjóðum sem hafa hlotið hæstu einkunn út frá alþjóðlegu UFS-mati. Um 18% af erlenda safninu er í sjóðum sem leggja sérstaka áherslu á sjálfbærni í fjárfestingum.
Birting þessara upplýsinga byggir á nýrri sjálfbærnistefnu sjóðsins sem samþykkt var í nóvember 2021. Í stefnunni er lögð áhersla á að sjálfbærni, umhverfismál, félagslegir þættir og stjórnarhættir (UFS-þættir) séu samþættir í greiningar á fjárfestingarkostum. Þá er lögð áhersla á virka upplýsingagjöf um starfsemi og eignasafn sjóðsins, m.a. sjálfbærni- og fjárhagsupplýsingar.
Ólafur Páll Gunnarsson, framkvæmdastjóri Íslenska lífeyrissjóðsins segir: „Við styðjum aðgerðir í loftslagmálum. Tilgangurinn með nýrri stefnu sjóðsins í sjálfbærnimálum er að búa til skilvirka og trúverðuga nálgun á álitaefni sem snúa að sjálfbærni og ábyrgum fjárfestingum. Umhverfismál, félagslegir þættir og stjórnarhættir eru lykilþættir í mati okkar á fjárfestingum og við teljum að fyrirtæki sem taka sérstakt tillit til þessara þátta í starfsemi sinni muni njóta ávinnings til lengri tíma litið. Með því að greina og birta þessar upplýsingar getum við, sjóðsfélagar og aðrir fylgst með þróun mála. Þannig erum við í betri stöðu til að koma auga á tækifæri til að veita aðhald og styðja fyrirtæki sem við fjárfestum í við að draga úr losun gróðurhúsalofttegunda.“
Áherslur Íslenska lífeyrissjóðsins
Stefna Íslenska lífeyrissjóðsins tekur mið af heimsmarkmiðum Sameinuðu þjóðanna um sjálfbæra þróun. Sjóðurinn hefur ákveðið að leggja sérstaka áherslu á jafnrétti kynjanna, loftslagsmál, ábyrga neyslu og framleiðslu og nýsköpun. Því verða heimsmarkmið nr. 5 (jafnrétti kynjanna), nr. 9 (nýsköpun og uppbygging), nr. 12 (ábyrg neysla og framleiðsla) og nr. 13 (aðgerðir í loftslagsmálum) í forgrunni við mat og greiningu fjárfestingarkosta.
- Íslenski lífeyrissjóðurinn styður jafnrétti kynjanna.
- Íslenski lífeyrissjóðurinn styður nýsköpun í öllum atvinnugreinum.
- Íslenski lífeyrissjóðurinn styður innleiðingu hringrásarhugsunar í allri neyslu og framleiðslu til að tryggja að nýting auðlinda fari ekki yfir þolmörk náttúrunnar.
- Íslenski lífeyrissjóðurinn styður aðgerðir í loftslagsmálum. Skref í þeirri viðleitni er að meta kolefnisspor eignasafnsins.
Sjálfbærni og ábyrgar fjárfestingar hjá Íslenska lífeyrissjóðnum
