Sérfræðingar Landsbankans í sjálfbærni fá til umsagnar lánsbeiðnir þar sem fyrirtæki óska eftir að fjármögnunin hljóti sjálfbærnimerki Landsbankans. Sérfræðingarnir staðfesta hvort viðkomandi fyrirtæki eða verkefni uppfylli skilyrðin sem tiltekin eru í umgjörðinni til þess að fjármögnunin hljóti sjálfbærnimerkið. Uppfylli verkefni eða fyrirtæki skilyrðin þá fer lánsbeiðnin áfram til ákvörðunaraðila lánamála til samþykkis eða synjunar samkvæmt útlánareglum bankans. 

Í umgjörðinni er skilgreint nánar hvaða framkvæmdir og/eða eignir falla undir hvern flokk. Hver og ein framkvæmd/eign er síðan flokkuð enn frekar eftir því með hvaða hætti hún stuðlar að sjálfbærni, þ.e.a.s. hvort um sé að ræða grænt (umhverfisvænt), félagslegt eða blátt (sjávarútvegur og loftslagsmál) verkefni. Landsbankinn hefur einnig tengt hvern og einn verkefnaflokk við heimsmarkmið Sameinuðu þjóðanna. Ef fyrirtæki er í vafa hefur það samband við viðskiptastjóra sinn sem fær sérfræðing í sjálfbærni innan bankans að borðinu sem aðstoðar við að leggja mat á verkefni.

Sjálfbærnimerkið lítur út eins og stimpill á rafrænu formi. Í miðju merkisins er lógó Landsbankans, heitið Sjálfbær fjármögnun kemur fram í efri hluta merkisins og í neðri hluta merkisins kemur fram nafn yfirflokksins eða undirflokksins sem viðkomandi verkefni sem fjármagnað er fellur undir. Ef um er að ræða fjármögnun á rekstri félags í heild sinni sem uppfyllir skilyrði um sjálfbæra fjármögnun þá kemur nafn fyrirtækisins fyrir í neðri hluta merkisins í stað yfirflokks eða undirflokks verkefnis.

Samþykki ákvörðunaraðili lánamála lán sem hlýtur sjálfbærnimerki Landsbankans þá staðfestir fyrirtækið skilmála (covenants) við lántökuna um að fjármagnið sé nýtt í fjármögnun verkefnis sem fellur undir umgjörðina. Viðkomandi fyrirtæki fær í kjölfarið sjálfbærnimerkið á rafrænu formi frá Landsbankanum, sem það getur notað í markaðsefni sínu á viðeigandi hátt samkvæmt reglum sem settar eru fram um notkun merkisins af hálfu Landsbankans. Með merkinu getur fyrirtækið þannig sýnt fram á að fjármögnun tiltekins verkefnis eða fyrirtækisins í heild sinni hafi hlotið sjálfbærnimerki Landsbankans.

Í byrjun árs 2021 gaf Landsbankinn út sína fyrstu sjálfbæru fjármálaumgjörð. Umgjörðin skilgreinir með skýrum hætti hvaða verkefni stuðla að sjálfbærni og tryggir gagnsæi. Umgjörðin eykur möguleika Landsbankans á að fjármagna umhverfisvæn og félagsleg verkefni, s.s. orkuskipti, umhverfisvæna innviði og sjálfbæran sjávarútveg.

Umgjörðin er vottuð af alþjóðlega matsfyrirtækinu Sustainalytics sem er leiðandi á þessu sviði. Hún skilgreinir með skýrum hætti hvaða verkefni stuðla að sjálfbærni og tryggir gagnsæi. Umgjörðin byggir á viðmiðum Alþjóðasamtaka aðila á verðbréfamarkaði (ICMA) og nýlegum viðmiðum Evrópusambandsins (EU Taxanomy) varðandi græna og félagslega fjármögnun, sem búist er við að verði ríkjandi viðmið á sjálfbærum fjármálamörkuðum.

Í bankanum er starfandi sjálfbærnihópur sem ber ábyrgð á því að bankinn standi við skuldbindingar sínar sem fram koma í umgjörðinni.