Austurstræti 11 og Hafnarstræti 10, 12 og 14 til sölu
Landsbankinn auglýsir til sölu hús bankans við Austurstræti 11 og Hafnarstræti 10, 12 og 14 í Reykjavík. Heildarstærð húsanna er 5.836 fermetrar og þar ef eru 1.380 fermetrar í kjallara. Húsin verða seld í einu lagi.
Landsbankahúsið við Austurstræti 11 er eitt glæsilegasta hús borgarinnar. Húsið var reist árið 1898 en var endurbyggt og stækkað árið 1924 eftir teikningum Guðjóns Samúelssonar sem teiknaði jafnframt allar innréttingar. Viðbygging við húsið var tekin í notkun árið 1940. Austurstræti 11 var friðað árið 1991 og nær friðunin yfir ytra byrði hússins, vegglistaverk og innréttingar sem voru gerðar árið 1924.
Hafnarstræti 10-12 gekk áður undir nafninu Edinborgarhúsið og var byggt árið 1923 eftir uppdráttum Einars Erlendssonar. Húsið var upphaflega þrjár hæðir en fjórðu hæðinni var síðar bætt ofan á. Hafnarstræti 14 var reist árið 1970. Jarðhæðin er tengd við afgreiðslusal Austurstrætis 11.
Landsbankinn flutti árið 2023 starfsemi sína úr alls 12 húsum við Austurstræti, Hafnarstræti og Tryggvagötu yfir í ný húsakynni við Reykjastræti 6. Íslenska ríkið lýsti á sínum tíma yfir áhuga á að kaupa Austurstræti 11 en nú er ljóst að ekki verður af kaupunum.
Salan er í höndum Eignamiðlunar og Mikluborgar. Nánari upplýsingar er hægt að fá með því að senda tölvupóst á netfangið kjartan@eignamidlun.is eða throstur@miklaborg.is. Óskað er eftir tilboðum.
