Sigríður Guðmundsdóttir nýr mannauðsstjóri Landsbankans
Sigríður Guðmundsdóttir hefur verið ráðin til starfa sem mannauðsstjóri Landsbankans.
Sigríður hefur um 15 ára reynslu af mannauðsstjórnun. Á árunum 2017 til 2020 starfaði hún sem mannauðsstjóri Eimskips. Áður var hún mannauðsráðgjafi hjá félaginu og verkefnastjóri starfsþróunar. Sigríður hefur einnig starfað sem ráðgjafi hjá Attentus en í dag starfar hún sem framkvæmdastjóri Fræðslumiðstöðvar atvinnulífsins.
Sigríður er með MBA-gráðu frá Háskóla Íslands. Hún hefur lokið námi í stjórnendamarkþjálfun (e. executive coaching) frá Háskólanum í Reykjavík, er með diplóma í fræðslustarfi og stjórnun frá Háskóla Íslands og B.Ed.-gráðu frá Háskólanum á Akureyri.
Sigríður tekur við öflugu teymi í Mannauðsdeild í byrjun febrúar.
Við þökkum fráfarandi mannauðsstjóra, Baldri Gísla Jónssyni, fyrir gott starf undanfarin ellefu ár og óskum honum velfarnaðar í leik og starfi.
