Síminn er að verða okkar þarfasti þjónn! Greiðslur með símum eru orðnar algengari en þær sem gerðar eru með kortunum sjálfum og hann er nauðsynlegur til að staðfesta kaup á netinu.
Í Landsbankaappinu í símanum finnum við á auðveldan hátt allar upplýsingar um kortin okkar, bæði númerin og PIN. Í appinu getum við líka kveikt á ýmsum vöktunum og öryggisstillingum til að vernda kortin, lokað kortum sem týnast og pantað ný sem eru tilbúin til notkunar í símanum nánast samstundis.
Síminn er því orðinn hluti af ferðamöntrunni sem ég kalla oft „hina heilögu ferðaþrenningu“. Áður en ég skelli í lás heima með ferðatöskuna í hendi, athuga ég hvort ég sé ekki ábyggilega með mína heilögu ferðaþrenningu: Vegabréf – Visakort – síma.
En eru greiðslukortin sjálf þá orðin óþörf? Svarið er ennþá „nei“ og það á enn frekar við þegar ferðast er til útlanda!
Snertilausar greiðslur eru öruggari, líka í útlöndum
Snertilausar greiðslur, eru greiðslur sem krefjast þess ekki að við setjum kort í posa og sláum in PIN en notum þess í stað Apple Pay, Google Pay, Garmin Pay eða snertilausa virkni kortanna sjálfra. Að greiða með þessum hætti er þægilegt og eykur öryggi til muna. Áhættan á því að óprúttnir aðilar komist yfir PIN á kortunum okkar minnkar stórlega. Sterk auðkenning er samt enn til staðar í okkur sjálfum, þ.e. með lífkenni á borð við fingrafar eða andlitsgreiningu.
Þurfum kortin til að taka út reiðufé
Þrátt fyrir allar nýjungarnar þarf enn kort til að taka út reiðufé í stórum hluta hraðbanka. Einnig er enn að finna kaupmenn víðs vegar um heim og í sumum tilfellum stórar verslunarkeðjur sem ekki taka á móti greiðslum með símum. Ég myndi þess vegna aldrei fara án korts til útlanda og ég tek alltaf bæði debet- og kreditkort með mér.
Bilið á milli þess hvort hagstæðara sé að nota debet- eða kreditkort til að taka út reiðufé er alltaf að minnka. Af reiðufjárúttektum erlendis með greiðslukortum greiðast þóknanir samkvæmt verðskrá bankans þar sem greidd er ákveðin prósenta af upphæðinni sem tekin er út, en aldrei minna en ákveðin lágmarksþóknun. Visagengi Landsbankans og lágmarksþóknun fyrir reiðufjárúttektir eru eins fyrir bæði debet- og kreditkort. Það er ekki fyrr en upphæðin fer yfir um það bil 30.000 íslenskar krónur sem debetkortin hafa vinninginn í lægri kostnaði því prósentuþóknunin þar er lægri en á kreditkortum. Ég nota alltaf debetkortið til að taka út reiðufé í hraðbönkum fyrst það er annað hvort jafn gott eða betra, en kreditkortið fyrir allar aðrar greiðslur, því þau bera ekki færslugjöld.
Til að finna gengi kortafærslna flettum við upp Visagenginu, sem finna má á vef bankans. Það er enginn annar færslu- eða aukakostnaður sem bætist ofan á Visagengið á kortum Landsbankans.
En þarf reiðufé?
Það er auðvitað mismunandi hvaða skoðun fólk hefur á því að vera með seðla og einnig getur skipt máli hvert er verið að fara. Mér finnst alltaf best að vera með allavega aðeins af seðlum til öryggis, jafnvel þó ég komi með þá alla heim aftur. Fyrir utan hefðbundin dæmi um leigubíla og lágar fjárhæðir, þá sýnir dæmið frá Portúgal og Spáni í lok apríl 2025 hvernig rafmagnsleysi getur sett kortaviðskipti á hliðina. Þá er gott að geta gripið í seðla.
Hvar er þá best að ná í gjaldeyri?
Ef þú hefur möguleika á því er ágæt regla að taka út gjaldeyri áður en lagt er af stað út á flugvöll, enda getur álagið þar verið hærra. Þú getur bæði farið í útibú og gjaldeyrishraðbanka Landsbankans sem staðsettir eru víðs vegar um landið og opnir allan sólarhringinn.
Ef reiðufé er tekið út í hraðbönkum í útlöndum ráðlegg ég fólki eindregið að taka út í hraðbönkum sem eru annað hvort staðsettir inni í eða við banka en forðast frekar frístandandi hraðbanka sem eru t.d. í matvöruverslunum og á flugvöllum. Ef það er samt nauðsynlegt er um að gera að skoða vel hvort sett séu á einhver auka þjónustu- og úttektargjöld.
Er úttektarheimildin nógu há fyrir ferðina?
Ef heimildin er ekki nógu há, má alltaf breyta heimild kreditkorta í Landsbankaappinu. Gott er að athuga áður en farið er hversu mikið svigrúm við höfum til að hækka heimildina sjálf eða hvort það þurfi að hringja í Þjónustuver eða fara í útibú til að breyta henni.
Hafið í huga að mörg hótel og ekki síst bílaleigur gera kröfu um að gestir og leigutakar leggi fram greiðslukort sem tryggingu og geta tekið frá heimild og haldið henni meðan á ferðinni stendur.
PIN - nokkrir punktar
Þar sem við nýtum okkur svo oft að greiða snertilaust er meiri hætta á að PIN gleymist. Það er því gott að hressa upp á minnið eða athuga fyrir ferðina hvort við séum ekki í aðstöðu til að fletta þeim númerum upp, t.d. í appinu eða netbankanum. Það gildir áfram að passa kortið og PIN vel, alls ekki skrifa þau hjá sér og geyma með kortunum, því við erum alla jafna ábyrg fyrir færslum sem staðfestar eru með PIN. Það er alveg ferlegt að lenda í því í miðju fríinu, áhyggjuleysinu og huggulegheitunum að búið sé að rífa út alla heimildina þannig að við sitjum eftir með tjónið og sárt ennið!
Ef við erum beðin um að staðfesta endurgreiðslu með því að slá inn PIN er gott að hafa varann á. Það er þekkt, en mjög óalgengt, að söluaðilar biðji um PIN þegar verið er að endurgreiða inn á kortin. Vertu því alveg viss um að verið sé að endurgreiða en ekki búa til nýja færslu.
Auðvitað getur komið fyrir okkur öll að gleyma PIN og ef rangt PIN er slegið of oft inn, þá læsist kortið. Ef þetta gerist þegar korthafi er staddur í útlöndum er í flestum tilvikum hægt að aflæsa því með því að fara í hraðbanka og taka út reiðufé. Gott er að miða við lágmarks úttektarfjárhæð að virði 10-15 þúsund íslenskar krónur.
Úttektir erlendis í íslenskum krónum
Fólk sem er á ferðalögum erlendis er oft spurt hvort það vilji greiða færsluna í sínum eigin gjaldmiðli, í stað gjaldmiðils viðkomandi lands. Alla jafna er hagstæðara fyrir korthafa að samþykkja erlendu úttektina í gjaldmiðli viðkomandi lands en ekki í íslenskum krónum. Mörgum þykir þessi möguleiki þó þægilegur þar sem þau sjá þá strax hvað margar íslenskar krónur viðkomandi hlutur kostar og upphæðin mun ekkert breytast eftir það. Við biðjum fólk samt um að skoða upphæðina vel áður en hún er samþykkt. Við fjölluðum nánar um þetta í pistli hér á Umræðunni fyrir nokkrum árum.
Kortin og öryggisstillingar í appinu
Undir „Öryggi, vöktun og lokun“ í appinu eru allar helstu aðgerðir sem snúa að kortum og viðskiptavinir þurfa að framkvæma. Ef kort glatast er hægt að loka því um leið og stofna nýtt í staðinn. Nýja kortið verður tilbúið til notkunar í símanum nánast samstundis.
Að nýta öryggisstillingar korta í appinu er frábær kostur til að auka öryggi hvort sem við erum í útlöndum eða heima. Í öryggisstillingunum er boðið upp á að loka fyrir notkun með plastkortinu sjálfu, loka fyrir snertilausa notkun, erlenda notkun og úttektir í hraðbönkum. Viðskiptavinir stjórna þessu alveg sjálfir, bæði að opna og loka fyrir notkun þegar þeim hentar.
Vöktun korta er einnig alveg frábær og ég hef sjálf nýtt mér þessa virkni alla tíð. Vöktunin virkar þannig að í hvert skipti sem kortið mitt er notað án þess að það sé á staðnum, t.d. í netgreiðslur, áskriftir, með bensínlyklum og þannig, þá fæ ég sms um það.
Tryggingavernd kreditkorta
Mismunandi er hversu víðtæk tryggingavernd fylgir kreditkortunum og fyrir brottför er gott að renna yfir upplýsingar og skilmála tryggingafélagsins Varðar, sem tryggir korthafa Landsbankans. Korthafar sem eru með innifaldar bílaleigutryggingar í kortunum sínum ættu að kynna sér vel yfir hvað þær ná og t.d. í hvaða löndum þær eru takmarkaðar eða gilda ekki.
Korthafar Landsbankans eru tryggðir á ferðalögum hvernig svo sem ferðin var greidd og þurfa ekki að hafa greitt ferðakostnað, fargjald eða gistingu til að virkja hefðbundnar kortatryggingar.
Önnur mikilvæg vernd sem kortin veita eru svo greiðsluverndin og endurkröfurétturinn. Þegar verslanir og þjónustuaðilar geta af einhverjum ástæðum ekki staðið við afhendingu á vörum eða þjónustu getur þetta skipt verulegu máli.
Þjónusta við korthafa allan sólarhringinn
Korthafar Landsbankans njóta sólarhringsþjónustu. Ef þig vantar upplýsingar eða aðstoð sér Þjónustuverið okkar um þjónustuna á afgreiðslutíma bankans í síma 410 4000 og í gegnum netspjall. Við svörum einnig erindum sem send eru í tölvupósti á netfangið landsbankinn@landsbankinn.is.
Ef þú hefur orðið fyrir fjársvikum hvetjum við þig til að láta okkur vita sem fyrst og eftir atvikum kæra málið til lögreglu. Starfsfólk Landsbankans er á vaktinni frá kl. 9 til 23 alla daga vikunnar og aðstoðar við að leysa úr svikamálum. Utan þess tíma færast símtöl sjálfkrafa yfir á neyðarnúmer vegna Visakorta, s. 525-2000.
Gyða skrifaði fyrst pistil um kortanotkun í útlöndum í maí 2018 en uppfærði hann síðast í maí 2025.
